अखबार नेपाल ट्रेन्डिङ

काठमाडौं: नेपाल राष्ट्र बैंकले ६४औं वार्षिकोत्सवको अवसर पारी शनिबार अर्थतन्त्रका सूचकहरु सकारात्मक रहेको र अर्थतन्त्रमा उत्साह छाएको बताएको छ । राष्ट्र बैंकका अनुसार राजनीतिक स्थायित्व कायम भएसँगै आर्थिक क्रियाकलापले गति लिन थालेको बताएको छ ।

कृषि उत्पादनमा भएको वृद्धि, ऊर्जा आपूर्तिमा देखिएको सुधार, पुनर्निर्माणले लिएको गति तथा पर्यटन क्षेत्रमा भएको आशालाग्दो प्रगतिले उत्साहजनक आर्थिक परिदृश्य देखिएको राष्ट्र बैंकको भनाई छ । वित्तीय पहुँच विस्तारका साथै कृषि, ऊर्जा, पर्यटनलगायत क्षेत्रमा कर्जा प्रवाह बढेको राष्ट्र बैंकले जनाएको छ ।

पूर्वाधार बैंक स्थापना, ७२४ स्थानीय तहमा वाणिज्य बैंकको उपस्थिति, बैंक निक्षेप तथा कर्जामा वृद्धि र शेयरबजारमा सुधारसमेतले उत्साह थपिएको भन्दै राष्ट्र बैंकले उच्च आर्थिक वृद्धिको बाटोमा अघि बढेको नेपालको आर्थिक वृद्धिदर तीन वर्षसम्म ७ प्रतिशतको हाराहारीमा रहने भनेको छ ।

संघीय सरकारले गरेको कुलखर्च ५ खर्ब ९६ अर्ब ६२ करोडमध्ये चालु खर्च ४ खर्ब ४७ अर्ब ५५ करोड तथा पुँजीगत खर्च १ खर्ब ३ अर्ब ४९ करोड रहेको छ । त्यस्तै चैत मसान्तसम्ममा राजस्व संकलन १९ दशमलब ५ प्रतिशतले बढेर ६ खर्ब ४ अर्ब ६० करोड रुपैंयाँ पुगेको छ । चैतसम्ममा चालु खाता १ खर्ब ९१ अर्ब १२ करोड र शोधनान्तर स्थिति ५८ अर्ब ९९ करोडले घाटामा रहेको राष्ट्र बैंकले जनाएको छ । ७.९ महिनाको वस्तु तथा सेवा आयात धान्न पर्याप्त रहने विदेशी विनिमय सञ्चिति रहेको केन्द्रीय बैंकले जनाएको छ ।

बैंक तथा वित्तीय संस्थाहरूको निक्षेप ९.७ प्रतिशत र निजी क्षेत्रतर्फ प्रवाहित कर्जा १४.६ प्रतिशतले बढेको छ । यो सातामात्रै ९१ अंकले उकालो लागेको शेयरबजार परिसूचक नेप्सेलाइ राष्ट्र बैंकले पूँजीबजारको गतिविधि स्थायित्वतर्फ उन्मुख भनेको छ । प्राथमिकता प्राप्त क्षेत्रतर्फ कर्जा वढाउने उद्देश्यले पुनरकर्जा कोषको सीमा वृद्धि गरी ५० अर्ब पुर्याइएको राष्ट्र बैंकले जानकारी दिएको छ ।