काठमाडौं: नेपाल बैंकर्स संघले राष्ट्र बैंकका पूर्वगभर्नर तथा नबिल बैंकका पूर्वअध्यक्ष सत्येन्द्रप्यारा श्रेष्ठलाई सम्मान गरेको छ ।

संघले वार्षिक साधारणसभाबाट बैंकिङ क्षेत्रमा योगदान दिएकाहरु मध्येबाट एक जनालाई सम्मान गर्दै आएकामा यो वर्षको सम्मान श्रेष्ठलाई प्रदान गरेको हो ।

राष्ट्र बैंकका गभर्नर महाप्रसाद अधिकारीले श्रेष्ठलाई सम्मान गरेका हुन् । सम्मानित भएका पूर्वगभर्नर श्रेष्ठले अहिलेको अवस्थाबाट अर्थतन्त्रलाई उकास्न बचत र लगानी वृद्धि आवश्यक भएको यसका लागि बैंकिङ क्षेत्र एकजुट भएर लाग्नुपर्ने टड्कारो आवश्यकता रहेको औंल्याए ।

संघको साधारणसभाले रिक्त रहेको उपाध्यक्ष पद र दुई सदस्य पद पनि पूर्ति गर्नेछ । संघको उपाध्यक्ष रहेको अनुकूल भट्नागर नेपाल एसबीआई बैंकमा कार्यकाल पूरा गरेर बाहिरिएपछि रिक्त थियो ।

उक्त पदका लागि खुलेको मनोनयनमा कृषि विकास बैंकका प्रमुख कार्यकारी अधिकृत अनिल उपाध्यायको मात्रै मनोनयन परेकाले उनी निर्विरोध निवार्चित हुने भएका छन् ।

यस्तै रिक्त भएको दुई कार्यकारी सदस्य पदमा पनि माछापुच्छ्रे बैंकका सीईओ सन्तोष कोइराला र नेपाल एसबीआई बैंकका सीईओ दीपककुमार दे को मात्रै आवेदन परेकाले उनीहरु पनि निर्विरोध निर्वाचित हुने संघले जनाएको छ ।

बैंकर्स संघलाई संघीय संरचनामा लैजान तथा कार्यविभाजन गर्नेलगायत एक दर्जनभन्दा बढी बुँदामा विधान संशोधन प्रस्तावसमेत साधारणसभामा पेस हुने संघले जनाएको छ ।

राष्ट्रिय वाणिज्य बैंक र सिप्रदी ट्रेडिङ्बीच कर्जा सम्बन्धी सम्झौता