अखबार नेपाल ट्रेन्डिङ

काठमाडौं:  एनआईसी एशिया बैंकले डिजिटल रकम स्थानान्तरणलाई प्रोत्साहन गर्न भाईटिका २०७७ को उपलक्ष्यमा डिजिटल दक्षिणा योजना ल्याएको छ । बैंकले भाईटिकामा ग्राहक महानुभावहरूले आफ्ना दिदीबहिनीलाई दिने दक्षिणा मोबाइल बैंकिङ् मार्फत प्रदान गर्नुभएमा दक्षिणा रकममा थप एक सय रुपैयाँ बैंकले आफ्नो तर्फबाट प्रदान गर्ने जनाएको छ ।

एनआईसी एशिया बैंकमा आबद्ध ग्राहक महानुभावहरूलाई भाईटिकाको दिनको लागि यो योजना लागू गरिएको छ भने योजनामा सहभागी हुन न्यूनतम पाँच सय रुपैयाँ स्थानान्तरण गर्नुपर्नेछ । यस योजना अवधीभर बैंकको तर्फबाट एक जनाले अधिकतम तीन सय रुपैयाँसम्म दक्षिणा प्राप्त गर्न सक्ने बैंकले जनाएको छ ।

उक्त रकम बैंकले योजना सम्पन्न भएको ७ दिनभित्र दक्षिणा प्राप्त गर्ने ग्राहक महानुभावको बैंक खातामा जम्मा गर्नेछ । यस योजनाअन्तर्गत मोबाइल बैंकिङ् एप प्रयोग गरी दक्षिणा दिँदा बैंकका ग्राहक महानुभावहरूले मोबाइल बैंकिङ् एपमा रहेको डिजिटल दक्षिणा मा ट्याप गरी आफुले दिन चाहेको रकम, एकाउन्ट नम्बर, खातावालाको नाम तथा भाईटिका विवरण अनिवार्य रुपमा उल्लेख गर्नुपर्ने छ ।

भाईटिकाको दिन  दिदीबहिनीहरूको हातबाट टिका ग्रहण गरेपछि दाजुभाईले सगुनस्वरूप दक्षिणा दिने प्रचलन रहिआएकोमा डिजिटल माध्यमको प्रयोग गरी दक्षिणा स्थानान्तरण गर्दा डिजिटल बैंकिङ् प्रवद्धनमा समेत सघाउ पुग्ने विश्वास लिएको छ ।

यो पनि पढ्नुहोला :https://www.akhabarnepal.com/2020/11/19098/