अखबार नेपाल ट्रेन्डिङ

आज नोभेम्बर १४ अर्थात विश्व मधुमेह दिवस । विश्वभर मधुमेहका बारेमा जनचेतना जगाउनका लागि हरेक वर्ष नोभेम्बर १४ मा विश्व मधुमेह दिवस मनाउने गरिन्छ । नेपालमा पनि यो दिवसमा विभिन्न कार्यक्रमको आयोजना हुने गर्छ ।
सामान्यतया रगतमा चिनीको मात्रा बढी भएमा चिनी रोग वा मधुमेह रोग लाग्दछ । एकपटक यो रोग लागिसकेपछि पूर्ण रुपमा निको हुँदैन तर यसलाई नियन्त्रणमा राख्न सकिन्छ । यसलाई समयमै उपचार गरेर नियन्त्रणमा ल्याइएन भने शरीरका महत्वूर्ण अंगहरुमा क्षति पुराउन थाल्छ । मधुमेहलाई शुरुदेखि नै लापरवाही गरियो र उपचार गरिएन भने भने यसले भयावह स्थिति निम्त्याउँछ । यसले मुटु, मिर्गौला, आँखा, नसा जस्ता महत्वपूर्ण अंगमा हानी पु¥याउँछ ।
मधुमेहका कारण सन् २०१२ मा मात्र विश्वभर ४८ लाख मानिसको मृत्यु भएको अन्तर्राष्ट्रिय मधुमेह संगठको तथ्यांकमा छ । अमेरिकन डाइबेटिज एसोसिएसन र विश्व स्वास्थ्य संगठनका अनुसार मधुमेह रोग पहिल्लो दुई शताब्दीदेखि बढ्दो क्रममा छ । विश्व स्वास्थ्य संगठनका अनुसार हाल विश्वभर ४४ करोड भन्दा बढि मानिस मधुमेहबाट पिडित छन् । अझ सन् २०४५ सम्ममा मधुमेहका रोगी ६२ करोड नाघ्ने अनुमान समेत गरिएको छ । नेपालमा केहि वर्ष यता मधुमेहका रोगीको संख्या बढ्दो क्रममा छ ।
मधुमेह बच्चादेखि वृद्धसम्म जोकोहीलाई पनि हुनसक्छ । तर यसका जोखिम समूहमा भने मोटा व्यक्ति, शारीरिक व्यायाम नगर्नेहरु, परिवारमा कसैलाई मधुमेह भएकाहरु, जंकफुड जस्ता अस्वस्थ खाना बढी खानेहरुमा यो रोगको जोखिम उच्च हुने गर्दछ ।