अखबार नेपाल ट्रेन्डिङ

काठमाण्डौं: सरकारले सोमबारबाट एअरलाइन्स कम्पनीहरुलाई २५ प्रतिशतसम्म उडानको अनुमति दिएसंगै झन्डै ६ महिनापछि सोमबारबाट आन्तरिक हवाई सेवा सुरु भएको छ।

निजी लगानीमा सञ्चालित हवाई क्षेत्रको अग्रणी संस्थाको रुपमा रहेको यती एअरलाइन्सले चालकदल, यात्रु र कर्मचारीको स्वास्थ्य सुरक्षालाई ध्यानमा राखि उच्च सर्तकता अपनाएर हवाई उडान सुरु गरेको छ।

एअरलाइन्सले आफ्नो २२ औँ स्थापना दिवसका अवसरमा पत्रकार सम्मेलन गरी हवाई उडान सुरु गरेको जानकारी गराएको हो। यससँगै पर्यटन उद्योगलाई बचाउन तथा आन्तरिक पर्यटनलाई चलायमान बनाउनका लागि ‘आन्तरिक पर्यटनका लागि सँगैसँगै’ भन्ने नारालाई अगाडि सारेको यती एअरलाइन्सले होटल, ट्राभल्स, ट्रेकिङ कम्पनीहरुको सहकार्यमा सहुलियत दरमा भ्रमण प्याकेजसमेत अगाडि सारेको छ।

प्योकजमा पोखरा, एभरेस्ट ट्रेल, मुक्तिनाथ, घान्द्रुक, जंगल सफारी चितवन र रारा भ्रमण, काठमाण्डौ आउनेका लागि पोखरा, विराटनगर, नेपालगञ्ज, भरतपुर, जनकपुर, भद्रपुर, भैरहवा, तुम्लिङटारबाट दुईतर्फी हवाई टिकटसहित बस्ने होटलको व्यवस्था मिलाएको एअरलाइन्सले जनाएको छ।

‘अब एअरलाइन्स उड्नमात्र होइन, घुम्न पनि’ भन्ने सन्देश आम यात्रुलाई दिनका लागि भ्रमण प्याकेज खरिद गर्ने पहिलो १०० जना खरिदकर्ता यात्रुलाई आकर्षक उपहार प्रदान गर्नुका साथै भ्रमण प्याकेज खरिदकर्ता यात्रुले सप्ताहव्यापी ‘लक्की ड्र’ मार्फत आकर्षक उपहार प्राप्त गर्नसक्ने यती एअरलाइन्सले जनाएको छ।

यती एअरलाइन्सले आफ्नो २२ औँ स्थापना दिवसका अवसर पारेर आजैदेखि ‘यती एअरलाइन्स मोबाइल एप’ समेत सञ्चालनमा ल्याएको छ। अब मोबाइल एपको माध्यामबाट टिकट बुकिङ गरे विशेष छुटको व्यवस्थासमेत लिन सकिने एअरलाइन्सले जनाएको छ। यती यती एअरलाइन्सले यात्रालाई सुरक्षित राख्न हरेक प्रयोगपश्चात वायुयान, यात्रु ओसारपसार गर्ने सवारीसाधन, ब्यागेज ट्रली तथा उपकरणको अनिवार्य निसंक्रमण गर्ने, कार्गो तथा लगेजहरुको आवश्यकताअनुसार निसंक्रमण गर्ने व्यवस्था मिलाएको जनाएको छ।