अखबार नेपाल ट्रेन्डिङ

काठमाडौं: नेपाली बजारमा डिजिटल माध्यमबाट हस्कभर्नाका दुई बाइक हस्कभर्ना ट्विन्स अर्थात भिटपिलेन २५० र स्भार्टपिलेन २५० लन्च गरिएको छ ।

स्विडिस ब्रान्डको हस्कभर्ना बहुप्रतीक्षित यी दुई बाइकको नेपाली बजारका लागि हंसराज हुलासचन्द एन्ड कम्पनी प्रालिले लन्चिङ सम्पन्न गरेको हो । हंसराज हुलासचन्द एन्ड कम्पनीले नेपाली बजारमा केटीएमका बाइक बिक्री-वितरण गरिरहेको छ । कम्पनीले केटीएम र हस्कभर्ना दुवै ब्रान्ड बिक्री गर्नका लागि सोरुमलाई अपग्रेड गरेको जनाएको छ ।

हस्कभर्ना स्भार्टपिलेन र भिटपिलेनसँग अद्वितीय स्विडेनी डिजाइन छ, जुन अन्डरस्टेटेड, मिनीमलिष्ट, एलीगेन्ट भएको कारणले अन्य प्रिमियम मोटरसाइकल सेग्मेन्टको मोटरसाइकलभन्दा अत्यन्त भिन्न भएको कम्पनीले जनाएको छ ।

स्भार्टपिलेन २५० मा रग्ड डिजाइनको अपराइट स्ट्यान्स हुनुको साथै यो डुअल पर्पज टायरको साथ आउँछ । यो अन र अफ-रोड दुवै यात्राहरूको लागि उपयुक्त छ । भिटपिलेन २५० मा स्पोर्टी डिजाइन, क्लिप भएको ह्याण्डलबार र फ्रन्ट लीन राइडिङ पोजिसन छ ।

२५० सीसीले फ्युल इन्जेक्टेड, लिक्विड कुल्ड सिंगल सिलिन्डर, ४–स्ट्रोक डीओएचसी इन्जिन सुविधा प्रदान गर्दछ, जसले उच्च गतिमा इन्जिन रिफाइनमेन्टको उच्च स्तरमा पन्ची टर्क उत्पादन गर्दछ । जसले गतिशीलता र रोमाञ्चले भरिएको सवारीको अनुभव दिन्छ ।

कम्प्याक्ट चेसिस डिजाइन, डब्ल्युपी सस्पेन्सन र प्रिमियम गुणस्तरको कम्पोनेन्टहरूको साथ, हस्कभर्ना ट्विन्सले डायनामिक प्रदर्शन र उत्कृष्ट सवारीको आराम सुनिश्चित गर्ने कम्पनीको दावी छ । यी दुवै बाइकको मूल्य ५ लाख ६९ हजार ९ सय रुपैयाँ निर्धारण गरिएको छ ।

हस्कभर्ना विश्वको सबैभन्दा पुरानो मोटरसाइकल ब्रान्ड हो र यो सन् १९०३ देखि निरन्तर उत्पादन भइरहेको छ । यसले मोटोक्रस रेसिङमा संसारमा वर्षौको आफ्नो अधिपत्य जमाउँदै आएको छ । आफ्नो अभूतपूर्व स्विडिस निर्माण र शिल्पकौशलका साथ प्रिमियम उच्च प्रदर्शन मेसिनहरु उत्पादन गर्नको लागि पश्चिमी विश्वमा यसले आइकनिक स्थान हासिल गरेको छ ।