अखबार नेपाल ट्रेन्डिङ

काठमाडौं: सिन्धुलीको कमलामाई नगरपालिकाले युवालाई स्वदेशमै उद्यममा लगाउने उद्देश्यले ‘युवालाई सहुलियत व्यावसायिक ऋण कार्यक्रम’ ल्याएको छ।

नगरपालिकाको सिफारिसका आधारमा राष्ट्रिय वाणिज्य बैंकले सो ऋण प्रवाह गर्ने र उक्त कार्यक्रम अन्तर्गत महिला ऋणीले १.८५ प्रतिशत र पुरुषले २.८५ प्रतिशत ब्याज अनुदान पाउँनेछन्।

दक्षता, क्षमता र सीप भएर पनि आर्थिक अवस्था कमजोर भएका कारण बेरोजगार भएर बस्नु परेका युवालाई लक्षित गरी सरल व्यवसायिक ऋण कार्यक्रम ल्याएको नगरप्रमुख खड्गबहादुर खत्रीले जानकारी दिनु भयो।

नगरपालिकाले १४ वटै वडाका युवाबाट आफूले गर्न चाहेको व्यवसायबारे आवेदन माग गर्ने र मागका आधारमा ऋण दिन उपयुक्त ठहर भएका युवालाई सरल ब्याजदरमा ऋण उपलब्ध गराउने छ।

नगरप्रमुख खत्रीका अनुसार यो कार्यक्रमअन्तर्गत नगरपालिकाको सिफारिसका आधारमा बैङ्कले पाँच लाखदेखि पाँच करोड रुपैयाँसम्म ऋण उपलब्ध गराउने छ।