अखबार नेपाल ट्रेन्डिङ

काठमाडौं: नबिल बैंक लिमिटेडले आफ्ना ऋणी ग्राहकहरूलाई कोरोना भाइरस महामारीबाट गम्भीर समस्यामा परेपछि शुन्य दशमलव २५ प्रतिशत छुट दिएको छ ।

बैंकले साउनमा आफ्ना सबै ऋणी ग्राहकहरूलाई ०.२५ प्रतिशत ब्याज दर घटाएको छ । यस्तो छुट खराब कर्जाका ऋणीले प्राप्त नगर्ने बैंकले जनाएको छ ।

नबिल बैंकबाट ऋण लिएका व्यक्ति र संस्थागत ग्राहकहरूले भोग्नु परेको निरन्तर कठिनाइलाई ध्यानमा राख्दै सबै ऋणीलाई लाग्ने ब्याज दरमा ०.२५ प्रतिशत छुट दिएको बैंकका प्रमुख कार्यकारी अधिकृत अनिल केशरी शाहले बताउनु  भयो ।

कुनै व्यक्तिको अटो वा होम लोन छ वा कम्पनीले लिएको हाइड्रो ऋण वा बीचमा अन्य कुनै ऋण लिएको छ भने उसले यो सुविधा पाउने छ ।

खराब ऋणीको सूचीमा रहेको वा समयमै ऋण चुक्ता नगरेको ऋणीले यो सुविधा नपाउने शाहले बताउनु भयो ।

कोरोना भाइरस संक्रमण रोकथाम, नियन्त्रण तथा उपचार कोषमा रु. ६ करोड हस्तान्तरण गरेको बैंकले आफ्नो दीर्घकालिन योजनामा सातै प्रदेशमा नबिल सरुवा रोग रोकथाम, नियन्त्रण तथा सहयोग केन्द्रका लागि अस्पताल निर्माण तथा उपचारमा सहयोग गर्न अघि बढ्ने योजना बनाएको छ ।