अखबार नेपाल ट्रेन्डिङ

काठमाडौं: पशुपति सेभिङ एण्ड क्रेडिट को–अपरेटिभ लि. ले सहकारी–सहकारी बीच बृहद एकीकरण अभियान संचालन गर्ने भएको छ ।

ललितपुरस्थित पशुपति सेभिङ एण्ड क्रेडिट को–अपरेटिभ लिमिटेडले ले ७७ जिल्ला र ७ सय ५३ स्थानीय तहका सम्पूर्ण सहकारी संस्थाहरुलाई समेटेर नेपालकै नमुना सहकारी संस्था निर्माण गर्ने लक्ष्यसहित बृहद एकीकरण अभियान संचालन गर्ने जनाएको छ ।

पशुपति सेभिङ एण्ड क्रेडिट को–अपरेटिभ लि. को २२औं साधारणसभाबाट निर्णय गरी अध्यक्ष सिवी लामाको संयोजकत्वमा मर्जर कमिटी निर्माण गरेको र यहि कमिटी मार्फत एकीकरणका लागि इच्छुक सहकारी संस्थाहरुका साथै सरोकारवालाहरुसँग सहजिकरण र समन्वय सुरु गरिने बताईएकाे छ ।

अर्थतन्त्रको एक खम्बाकाे रूप मानिएको सहकारी अभियान स–साना संस्था संचालन गरेर राज्यले राखेको उद्देश्य पुरा नहुने बताउँदै वृहद एकीकरण गरी बलियो पुँजीगत आधार सहितको ठूलो नेटवर्क भएको संस्था बनाउन बृहद एकीकरण अभियान संचालन गर्न लागिएको संयोजक लामाले बताए ।

सहकारी मार्फत अत्याधुनिक सेवा र ठूला परियोजनाहरुमा लगानी गर्न नसकिएका कारण पूँजीगत आधार बलियो भएको दिगो सहकारी संस्था निर्माण गरी त्यसमार्फत उत्पादनमुलक ठूला उद्योग तथा व्यवसाय संचालन गर्ने लक्ष्य रहेको समेत संयोजक लामाले बताए ।

संघिय सरकारले आर्थिक वर्ष २०७७/०७८ बजेट वक्तव्यमा सहकारी संस्थाहरु एकीकरणका लागि प्रोत्साहन गर्ने निर्णय गर्नुका साथै संघिय सहकारी विभाग र राष्ट्रिय सहकारी महासंघ लगायतका संघसंस्थाले सहकारी एकीकरणलाई प्रोत्साहन गरिरहेको अवस्थामा सम्पूर्ण सरोकारवालाहरुलाई यस अभियानमा सहकार्य, समन्वय र हातेमालो गर्न संयोजक लामाले आग्रह गरेेेेेेेेका छन् ।