अखबार नेपाल ट्रेन्डिङ

काठमाडौं: सरकारले कर तिर्ने समय असार ७ गतेसम्मलाई थप गरेको छ । आन्तरिक राजस्व विभागले मंगलबार सूचना जारी गर्दै जेठ २५ गतेभित्र कर भुक्तानी गरिसक्न भनेको थियो । त्यसपछि अर्थमन्त्री र मन्त्रालयका अधिकारीहरुको विरोध सुरु भएको थियो । ब्यापक विरोधपछि सरकारले लगत्तै विभागले अर्को सूचना जारी गर्दै कर तिर्ने समय बढाएको हो ।

विभागले बुधबार जारी गरेको सूचनामा असार ७ गतेसम्म कर नतिरेमा जरिवाना लगायतका कारवाही गर्ने भाषा प्रयोग भएको छैन । मंगलबार जारी भएको विभागको सूचनामा भने तोकिएको मितिमा नबुझाए ब्याज र जरिवाना लिने उल्लेख थियो । लकडाउनको अवधिमा कर तिर्न उर्दी जारी गरेकोमा मंगलबार करदाता उद्योगी-व्यवसायीमात्रै नभइ सर्वसाधारणले पनि अर्थमन्त्री डा. युवराज खतिवडाको आलोचना गरेका थिए ।

आफ्नै पार्टीको सरकारका अर्थमन्त्री खतिवडाप्रति नेकपा कार्यकर्ताले सामाजिक सञ्जालमा विरोध जनाएका थिए । उद्योगी-व्यवसायीसँगै प्रमुख प्रतिपक्षी दल कांग्रेसले पनि सरकारको यो निर्णय ठीक नभएको जनाएको थियो । बुधबार जारी भएको सूचनामा अघिल्लो दिनजस्तो असार ७ गतेभित्र नबुझाएमा ब्याज तथा जरिवाना तिर्नुपर्ने लगायतका कडिकडाउ गर्ने भाषा उल्लेख गरिएको छैन । सरकारले जेठ ३२ गतेसम्म लकडाउन गर्ने घोषणा गरेको छ । विभागले असार ७ गतेसम्म कर तिर्न अर्को सूचना जारी गरेको छ ।