अखबार नेपाल ट्रेन्डिङ

काठमाडौं:  प्रधानमन्त्री केपी शर्मा ओली र तीनदिने नेपाल भ्रमणमा रहेका भारतीय स्थल सेनाध्यक्ष मनोज मुकुन्द नरवणेबीच भेटवार्ता भएको छ । प्रधानमन्त्री निवास बालुवाटर गई उनले प्रधानमन्त्री ओलीसँग शिष्टाचार भेट गरेका हुन्।

तीन दिनअघि नेपाल भ्रमणमा आएका नरवणेले शुक्रबार स्वदेश फर्किनुअघि प्रधानमन्त्री केपी शर्मा ओलीसँग भेट गरेका हुन् । भेटमा प्रधानमन्त्रीसँगै उनका विदेश मामिला सल्लाहकार राजन भट्टराई र परराष्ट्र मन्त्रालयका सचिव भरतराज पौडेल पनि सहभागी छन् ।

बुधबार नेपाल आएका भारतीय स्थल सेनाध्यक्ष नरवणेलाई बिहीबार राष्ट्रपति विद्यादेवी भण्डारीले नेपाली सेनाको मानार्थ महारथी पदले सम्मान गरेकी थिइन्। उनले बिहीबार नै प्रधानसेनापति पूर्णचन्द्र थापासँग द्विपक्षीय वार्ता गरेका थिए।

नरवणे तीनदिने नेपाल भ्रमण सम्पन्न गरी आज स्वदेश फर्कदै छन्।