अखबार नेपाल ट्रेन्डिङ

काठमाडौं:  मेलम्ची खानेपानी आयोजनाको बैंक ग्यारेन्टी रकम फिर्ता गर्ने वा नगर्ने भन्ने सम्बन्धमा चिनियाँ अदालतमा चलिरहेको मुद्दा नेपाली बैंकहरुको पक्षमा भएको छ ।

चीनको हेनान प्रान्तस्थित झङझाओ इन्टरमिडियट कोर्टमा चलेको चाइना कन्स्ट्रक्सन बैंक र नेपाली बैंकहरुबीचको मुद्दामा अदालतले नेपाली बैंकको पक्षमा फैसला सुनाएको हो ।

बैंक अफ काठमाण्डू र हिमालयन बैंकको काउन्टर ग्यारेन्टीवापत फसेको १ अर्ब ४० करोड रुपैयाँ चाइना कन्स्ट्रक्सन बैंकबाट फिर्ता पाउने भएका छन्।

मेलम्ची खानेपानी आयोजनाको ठेकेदार कम्पनी चाइना रेल्वे कम्पनीले चाइना कन्स्ट्रक्सन बैंकमार्फत् बैंक अफ काठमाण्डू र हिमालयन बैंकबाट बैंक ग्यारेन्टीमार्फत् रकम भुक्तानी लिएको थियो ।उक्त कम्पनीले आयोजनाको काम बीचैमा छोडिदिएपछि आयोजनाले बैंक ग्यारेन्टी बापतको रकम जफत गरेको थियो ।

कम्पनीको बैंक ग्यारेन्टी जफत भएपछि हिमालयन र बीओकेले चाइना कन्स्ट्रक्सन बैंकसँग त्यस्तो ग्यारेन्टीबापतको रकम भुक्तानी माग गरेको थियो । तर, सो बैंकले यस्तो माग अस्वीकार गरेपछि यो विषय अदालतसम्म पुगेको हो । तर, ठेक्का प्रक्रियामा बैंकहरुको भूमिका नहुने भन्दै बैंक ग्यारेन्टी बापतको रकम भुक्तानी गर्न आदेश दिएको हो ।

यो आदेश प्राप्त भएसँगै बैंक अफ काठमाण्डूको ९० करोड र हिमालयन बैंकको करिब ६६ करोड रुपैंया आउने बाटो खुला भएको छ । त्यसका लागि बैंकहरुले आजै चाइना कन्स्ट्रक्सन बैंकलाई पत्राचार गरेको जनाएका छन् ।