अखबार नेपाल ट्रेन्डिङ

काठमाडौ: मलेसियामा नेपालीलाई अपहरण गरी फिरौती असुली गर्ने एक जनालाई प्रहरीले पक्राउ गरेको छ ।

पक्राउ पर्नेमा मोरङको सुन्दरपुर घर भई हाल मलेसियास्थित टप ग्लोभ कम्पनीमा नेपाल कर्नर क्यान्टिन सञ्चालन गरी बस्ने ४४ वर्षीय डेभिड भन्ने दुर्गा बहादुर श्रेष्ठ रहेका छन् ।

उनलाई केन्द्रीय अनुसन्धान ब्यूरो (सिआईबी)ले नेपाल आएको समयमा काठमाडौँको कान्ति बाल अस्पताल नजिकै गाडीमा सवार रहेकै अवस्थामा पक्राउ गरेको हो ।

उनीमाथि मलेसियामा नै काम गर्ने दाङको पहरुवा बस्ने मध्म रैदासलाई अपहरण गरी सात दिनसम्म बन्धक बनाइ झण्डै १६ लाख फिरौती लिएको आरोप छ ।

उनले आफ्नी श्रीमती मार्फत फिरौती रकम लिने गरेको तथ्य समेत खुलेको छ । यस कार्यमा उनले आफ्ना चालकलाई समेत सामेल गराउँदै आएका थिए ।

मलेसियामा कार्यरत रैदासलाई डेभिडले बन्धक बनाई उनकी श्रीमतीलाई मलेसियाका विभिन्न नम्बरबाट फोन गरी रकम पठाउन अन्यथा मारिदिने भन्दै धम्की दिएको उजुरी परेको थियो ।

फिरौती बापतको १५ लाख ९२ हजार रकम नेपालबाट पठाएपछि मात्रै अपहरित व्यक्तिलाई अपहरण मुक्त गरेको र राहदानी आफ्नो कब्जामा राखेजस्तै गरेका छन् ।

राहदानी नभएका कारण रैदास अझै नेपाल आउन सकेका छैनन् । यस विषयमा प्रहरीले अनुसन्धान थालेको छ ।

उता पक्राउ परेका श्रेष्ठ पक्षले भने घटना लेनदेन सम्बन्धि भएको र प्रहरी अर्को समूहको प्रभावमा परेर पक्राउ गरेको दाबी गरेको छ ।