अखबार नेपाल ट्रेन्डिङ

रामेछाप: रामेछाप जिल्लाको लिखु तामाकोसी गाउँपालिकाका अध्यक्ष गोविन्द बहादुर खड्का पक्राउ परेका छन् ।

शरिर बन्दक तथा ठगीको आरोपमा प्रहरीले अध्यक्ष खड्कालाई आज गाउँपालिकाबाट नै पक्राउ गरेको हो ।

गाउँपालिकामा सञ्चालित विकास योजनाको उपभोक्ता समितिका पदाधिकारीहरुलाई बन्दक बनाएर खालि चेकमा हस्ताक्षर गर्न लगाएको उजुरीका आधारमा अध्यक्ष खड्कालाई पक्राउ गरिएको रामेछापका प्रहरी प्रमुख बशन्त पाठकले बताए ।

स्थानीयहरुले गाउँपालिकालाई दिएको जग्गा गाउँपालिकाको नाममा नभई व्यक्तिको नाममा पास गराई ठगी गरेको आरोप पनि खड्कालाई लागेको प्रहरी प्रमुख पाठकले जानकारी दिए ।

खड्कालाई शरिर बन्दकको कसुरमा म्याद थप गरी अनुसन्धान अगाडि बढाउने प्रहरीको तयारी छ ।

बेला बेला विवादमा आइरहने खड्काले केहि दिन अगाडि मात्र गाउँपालिकाबाट सुचना जारी गरी लिखु जलविद्युत आयोजनाको कुनैपनि सावारी साधन आफ्नो गाउँपालिकामा चल्न नदिने भन्दै रोक लगाएका थिए ।

जलविद्युत आयोजनाले बाटो मर्मतमा ध्यान नदिएको भन्दै खड्काले आयोजनाको ढुवानीका साधन समेत चल्न नदिएपछि ५ दिनदेखि ठुला मालवाहक सवारी साधनहरु बाटोमा नै अलपत्र परेका थिए ।