अखबार नेपाल ट्रेन्डिङ

काठमाडौं: विश्वमा महामारीको रुप लिएको कोरोना भाइरसको प्रभाव विश्वव्यापी बनेको छ । अहिलेसम्म १ सय २७ वटा देशमा कोरोना भाइरसको संक्रमण देखिएको छ । विश्व स्वास्थ्य संगठनले कोरोना भाइरसलाई महामारीको घोषणा समेत गरेको छ । कोरोनाको प्रभाव फैलिएसँगै नेपाल सरकारले वैदेशिक रोजगारीमा जानेका लागि दिने गरेको श्रम स्वीकृति अनिश्चितकालसम्मका लागि स्थगित गरेको छ ।

बिहीबार बसेको उच्चस्तरीय सम्वन्य समितिको बैठकले अर्को सूचना प्रकाशन नहुन्जेलसम्म श्रम स्वीकृति रोकेको वैदेशिक रोजगार विभागले जनाएको छ । नेपालको मुख्य श्रम गन्तव्य कतार, शाउदी, मलेसिया, यूएई लगायतका देशमा पनि अहिले कोरोना भाइरसको संक्रमण फैलिएको छ । विदेशीहरुलाई दिइँदै आएको अनअराइभल भिसा १४ मार्च २०२० देखि ३० अप्रिल २०२० सम्म लागि यस अघि नै स्थगित गरिएको छ ।

यसअघि भिसा लिइसकेका विदेशी नागरिकहरुले नेपालको अध्यागमन विन्दूमा आईपुग्ने मितिभन्दा एकसाताभित्र स्वास्थ्य जाँच रिपोर्ट अध्यागम कार्यालयमा बुझाउनु पर्ने व्यवस्था गरिएको छ । ४ मार्च अर्थात् शनिवारदेखि नेपाल प्रवेश गर्ने नेपाली, गैरआवसीय नेपाली र विदेशीहरुले १४ दिनसम्म क्वारेन्टाइनमा बस्नुपर्ने छ ।

कोरोनाको संक्रमण बढ्न नदिन भन्दै कतारले यसअघि नै नेपालीसहित १४ देशका नागरिकलाई प्रवेशमा रोक लगाएको छ । त्यस्तै कुवेतका लागि पनि भिसा दिन बन्द गरिसकेको छ । भारतले पनि आफ्नो देश प्रवेश गर्नेहरुमाथि रोक लगाएको छ भने प्रवेश गर्नेलाई क्वारेन्टाइनमा राख्ने जनाएको छ ।