अखबार नेपाल ट्रेन्डिङ

काठमाडौं: पाचौं संस्करणको एनभिए महिला तथा पुरुष भलिवल प्रतियोगितामा एपीएफ क्लबले विजयी सुरुवात गरेको छ । त्रिपुरेश्वरस्थित राखेप कभर्ड हलमा शुक्रबार भएको पुरुषतर्फको खेलमा रारा बुलबुले क्लबलाई तीन शुन्यको सेटमा पराजित गर्दै एपीएफले विजयी सुरुवात गरेको हो ।

एपीएफले २३-२५,२५-१२, २५-२० र २५-१८ को सेटमा पराजित गर्दै जित निकाल्न सफल भयो । जितसँगै समूह ’बी’ मा रहेको एपीएफ क्वाटरफाइनल नजिक पुगेको छ । एपीएफले १ खेलमा २ अंक जोडेको छ । पुरुषतर्फ नै साविक विजेता त्रिभुवन आर्मी क्लबले आरजी ग्रुपलाई तीन शुन्यको सोझो सेटमा पराजित गरेको थियो ।

आर्मीले आरजी ग्रुपलाई २५-९, २५-१६ र २५-९ ले पराजित गर्‍यो । महिलातर्फ नेपाल पुलिस क्लबलाई ३-२ को सेटमा पराजित गर्दै न्यू डायमण्डले सुखद सुरुवात गरेको छ । न्यू डायमण्डले पुलिसमाथि १७-२७,२५-१८,२३-२५,२५-१७ र १५-११ को जित निकाल्यो । प्रतियोगिताको पुरुषतर्फ ११ टिम तथा महिलातर्फ ७ टिम सहभागी छन् ।

माघ १० गतेसम्म चल्ने प्रतियोगिताको महिला र पुरुष दुवैको विजेताले २ लाख रुपैंयाँ पुरस्कार पाउने छन् । त्यस्तै दोस्रोले १ लाख र तेस्रोले ५० हजार रुपैंयाँ पाउने छन् । महिला र पुरुषको सर्वोकृष्ट खेलाडीले २५ हजार रुपैंयाँका दरले पुरस्कार पाउने छन् । यस्तै उत्कृष्ट स्पाइकर, लिब्रो, सरभर, बल्कर, लिफ्टर र प्रशिक्षकले जनही १० हजार पाउनेछन् ।