अखबार नेपाल ट्रेन्डिङ

एजेन्सीः बेलायतका राजकुमार ह्यारी र उनकी पत्नी मेघनले अब हिज-हर रोयल हाइनेस (एचआरएच) उपाधि प्रयोग गर्न नपाउने र उनीहरुले पब्लिक फन्डको रकम पनि नपाउने भएका छन् । बकिङ्घम राजदरबारले शनिबार सो कुराको घोषणा गरेको हो ।

साथै सो दम्पतीले बेलायतकी महारानीलाई औपचारिक रुपमा प्रतिनिधित्व पनि नगर्ने राजदरबारले जनाएको छ । ड्युक एण्ड डचेस अफ ससेक्स (ह्यारी दम्पती)को लागि छुट्याइएको करदाताको २ दशमलब ४ मिलियन पाउण्ड अब उनीहरुको बेलायती परिवारमा नै रहने जनाइएको छ । पछिल्लो व्यवस्थापन आउँदो वसन्त ऋतुबाट लागु हुने बताइएको छ । गएको सोमबार राजपरिवारका वरिष्ठ सदस्यहरुबीचको बैठकपछि राजदरबारको पछिल्लो भनाइ आएको हो । हालै सो दम्पतीले वरिष्ठ शाही परिवारबाट बाहिरिने घोषणा गरेको थियो ।

बेलायती महारानीले धेरै महिनासम्मको कुराकानी र हालैको छलफलबाट आफ्नो नाति र उनको परिवारको बारेमा रचनात्मक र सहयोगी बाटो पहिल्याउने काम भएकोमा खुसी व्यक्त गरेको राजदरबारको वक्तव्यमा उल्लेख छ । वक्तव्यमा ह्यारी, मेघन र आर्ची आफ्नो परिवारको धेरै माया गरिएका सदस्य सधैं रहने समेत जनाएकी छन् । उनीहरुले सामना गर्नुपरेको चुनौती आफूले महसुस गरेको र उनीहरुको अझ स्वतन्त्र जीवनका लागि समर्थन गर्ने महारानीले जनाएकी छन् ।