अखबार नेपाल ट्रेन्डिङ

काठमाडौं: सहिद स्मारक ए डिभिजन लिग अन्तर्गत आज दुई खेल हुँदैछन् । लिगको तेस्रो दिन आज दशरथ रंगशाला र एन्फा कम्प्लेक्समा एक–एक खेल हुनेछन् । आजको पहिलो खेलमा न्युरोड टिम एनआरटी र सरस्वतीबीच प्रतिस्पर्धा हुनेछ । यी दुईबीचको खेल सातदोबाटोस्थित एन्फा कम्प्लेक्समा दिनको साढे १२ बजे सुरु हुनेछ ।

यस्तै, दशरथ रंगशालामा हुने दोस्रो खेलमा विभागीय टिम नेपाल पुलिस क्लब र हिमालयन शेर्पा दिउँसो साढे २ बजे आमनेसामने हुनेछन् । आज लिगको चौथो खेलमा एनआरटीले सरस्वती युथ क्लबसंग प्रतिस्पर्धा गर्न लागेको हो । लिगको पहिलो खेलमा दुबै टिम स्पष्ट तीन अङ्क बटुल्न प्रयास गर्नेछन् । एनआरटीले यस पटक राष्ट्रिय टिमका पुर्ब सदस्य प्रकाश बुढाथोकी, सागका स्वर्ण बिजेता टिमका सदस्य स्ट्राइकर राजेश पराजुली सहित नेपाल पुलिस क्लबका पुर्ब कप्तान बिक्रम धिमाललाई मुख्य खेलाडीको रुपमा क्लबमा जोडेको छ ।

लिगको पाँचौ खेलमा पुलिसले हिमालयन शेर्पासंग खेल्दै नयाँ सिजनको सुरुवात गर्दैछ । खेल दशरथ रंगशाला दिउँसो साढे २ बजे सुरु हुनेछ । पुलिस पहिलो खेलमा हिमालयन शेर्पासंग तीन अंक बटुल्न चाहन्छ । यता, शेर्पा पुलिसलाई हराउँदै लिगमा सुखद सुरुवात गर्न चाहन्छ । राष्ट्रिय टिमका तीन स्टार खेलाडी सम्मिलित पुलिस केही अनुभवी खेलाडी सहित मैदान उत्रनेछ । राष्ट्रिय फुटबल टिमका तेज तामाङ, रबि पासवान र अजित भण्डारी पुलिसका नियमित सदस्य हुन् । अनुभवी खेलाडी भोला सिलवाल, कप्तान जुमानु राई र सुमन सुवेदी पुलिसको जर्सीमा हुनेछन् ।