अखबार नेपाल ट्रेन्डिङ

काठमाडौं: नेपालमा ‘एड्भेन्चर’देखि हरेक किसिमका पर्यटकीय अनुभव गर्न सकिने भन्दै चर्चित मिडिया कम्पनी फोर्ब्सले नेपालको पर्यटनको विस्तारित बारे चर्चा गरेको छ । नेपाल भ्रमण वर्ष सन् २०२० मा घुम्नैपर्ने १० वटा देशको सूचीमा नेपाललाई पहिलो स्थानमा समावेश गरेको छ ।

“बाघका पाइला खोज्दै दिनभरि चितवनका जङ्गल चहार्नु अनि बेलुका नारायणी नदी किनारबाट सूर्यास्तको आनन्द लिनु नेपालमा मनै लोभ्याउने अनुभव हो” फोर्ब्सले लेखेको छ । फोर्ब्सले नयाँ दशकका लागि घुम्नुपर्ने देशका रूपमा तयार गरेको ‘बकेट लिस्ट’मा नेपाललाई विशेष रूपमा प्रस्तुत गरेको हो । ‘एडभेन्चर’देखि गुणस्तरीय पर्यटनसँग सम्बन्धित रहेर विश्वका विभिन्न छ वटा महादेशमध्येबाट फोर्ब्सले १० वटा देश यो सूचीमा राखेको जनाएको छ । सूचीमा पहिलो स्थानमा रहेको नेपालबारे रोचक प्रसङ्ग र अनुभव पनि फोर्ब्सले प्रस्तुत गरेको छ ।

विश्वकै चर्चित ‘एडभेन्चर’ गन्तव्य सगरमाथा भएको देशमात्र होइन, अत्यन्त ‘लक्जरी’ रिसोर्टसमेत भएको स्थानका रूपमा फोर्ब्सले नेपाललाई चिनाएको छ । चितवन र बर्दियाको सफारी क्याम्प जस्ता अद्भुत अनुभव नेपालमा लिन सक्ने जनाइएको छ । फोर्ब्सका अनुसार नेपाल भ्रमण दक्षिणतर्फबाट जङ्गल सफारी गरेर सुरु गर्दा गज्जबको अनुभूति हुने उल्लेख गरेको छ । यस बाहेक फोर्ब्स छिनमै बदलिने मौसम अनुभव गर्दै हिमाली क्षेत्रतर्फको ट्रेकिङलाई पनि महत्वका साथ गर्नैपर्ने गतिविधिका रूपमा उल्लेख गरेको छ ।

त्यस्तै योग र ध्यानका लागि पर्याप्त स्थानहरूको विवरण पनि फोर्ब्सले प्रस्तुत गरेको छ । “विश्वमा योगध्यान प्रचलनमा आउनुभन्दा अघि नै नेपालबाट यसको सुरुआत भएको हो”, फोर्ब्सले उल्लेख गरेको छ । फोर्ब्सको यो सूचीमा नेपालपछि दक्षिण अमेरिकी मुलुक इक्वेडर छ । त्यसपछि क्रमशः न्युजिल्यान्ड, पेरु, अलास्का, ब्राजिल, मोरक्को, चीन, फिनल्यान्ड, केन्या परेका छन् ।