अखबार नेपाल ट्रेन्डिङ

काठमाडौं: सुझबुझपूर्ण र दूरदर्शी कमाण्ड अनि हरेक ट्राफिक काम-कारबाहीलाई सिर्जनशील, प्रभावकारी र परिणाममुखी बनाउनुपर्छ, त्यसले जनमन छुनुपर्छ भन्ने स्पष्ट मान्यता राख्ने काठमाडौं उपत्यका ट्राफिक प्रहरी कार्यालयका प्रमुख प्रहरी वरिष्ठ उपरीक्षक सुरेशप्रसाद काफ्लेले कमाण्ड सम्हालेसँगै हराएका-चोरी भएका दुई पाङ्ग्रे सवारी साधन (मोटरसाइकल र स्कुटर) पक्राऊ पर्ने क्रमले थप तीव्रता पायो र सवारीधनीले आफ्नो सवारी साधन प्राप्त गर्ने सिलसिलासँगै ट्राफिक प्रहरी प्रशंसाको पात्रमात्र भएन, दक्षिण एसियाको उत्कृष्ट अनुसन्धाता नेपाल प्रहरीको शाख पनि थप उजिल्याउँदै गएको छ ।

काठमाडौं उपत्यका ट्राफिक प्रहरी कार्यालयका प्रवक्ता प्रहरी उपरीक्षक नरेशराज सुवेदी भन्छन्- ‘सडक सञ्जालमा भएको विकाससँगै मानिसको जीवनमा देखिएको व्यस्ततालाई व्यवस्थापन गर्ने सबैभन्दा लोकप्रिय र प्रभावकारी सवारी साधन मोटरसाइकल नै हो । मोटरसाइकलसँग जहाँ मान्छेको सपना, संघर्ष, खुशीका साथै भावनात्मक सम्बन्ध समेत जोडिएको हुन्छ । अर्काको खुशी, सपना, संघर्ष र सम्पत्ति खोसेर-लुटेर खुशी बन्न खोज्नु गम्भीर अपराध हो । यस्तो आपराधिक कार्यमा संलग्नलाई निर्मम कानूनी कारबाही गर्नुपर्छ । त्यसका लागि हामीले मानवीय जनशक्तिसहित प्रविधिको उच्चतम प्रयोग गरी निगरानी बढाइरहेका छौं ।’

यसैबीच काठमाडौं उपत्यकामा विभिन्न मिति र समयमा चोरी भएका ५० वटा (२५ वटा स्कुटी र २५ वटा मोटरसाइकल) सवारी साधन खोज-तलासको क्रममा फेला पारी काठमाडौं उपत्यका ट्राफिक प्रहरी कार्यालयले सम्बन्धित सवारी धनीलाई बुझाएको छ । चालू आ.व. २०८२/०८३ मा खोज-तलासको क्रममा ३ सय ३ सवारी साधनहरु फेला पारेको समेत उक्त कार्यालयले जनाएको छ । चालू आ.व. मा मोटरसाइकल चोरीमा संलग्न भएको आशंकामा ३४ जना व्यक्तिलाई पक्राउ गारी थप कारबाहीका लागि जिल्ला प्रहरी परिसरहरूमा पठाइएको छ भने ३ वटा चार पाङ्ग्रे गाडी र २ वटा मोटरसाइकलहरु कारबाहीका लागि भन्सार कार्यालयमा पठाएको जानकारी प्रवक्ता प्रहरी उपरीक्षक सुवेदीले दिएका छन् ।

व्यक्तिगत शतर्कता, प्रविधिको उच्चतम प्रयोग र भौतिक सुरक्षाबीचको संयोजनबाट नै मोटरसाइकल चोरी नियन्त्रणमा सफलता प्राप्त गर्न सकिन्छ । सवारी साधन चोरी तथा हराउनबाट रोक्न आफ्नो सवारी साधन सुरक्षित स्थानमा पार्किङ गरी ह्याण्डिल लक, डिस्क लकलगायत सुरक्षा साइरनहरू जडान गर्न साथै जीपीएस जडान, मानिसहरूको आवत-जावत नहुने एकान्त स्थानमा सवारी साधन पार्किङ नगर्न काठमाडौं उपत्यका ट्राफिक प्रहरी कार्यालयका प्रमुख प्रहरी वरिष्ठ उपरीक्षक सुरेशप्रसाद काफ्लेले अनुरोधसमेत गरेका छन् । सवारी साधन हराएमा ट्राफिक प्रहरीको हटलाइन नम्बर १०३, नेपाल प्रहरीको हटलाइन नम्बर १०० मा फोन गर्न र नजिकको प्रहरी वा ट्राफिक प्रहरी कार्यालयमा निवेदन दिन सकिने व्यवस्था मिलाइएको छ ।