अखबार नेपाल ट्रेन्डिङ

काठमाडौं: हङकङमा क्रियाशील ब्रदर्स एफसीले नेपाल भ्रमणका क्रममा कलाकार, पत्रकार र विभिन्न सञ्चारमाध्यममा आवद्ध सञ्चारकर्मीलाई जर्सी वितरण गरेको छ । खेलकुद शारीरिक स्वास्थ्यसँगै आपसी मित्रता, सहकार्य, अनुशासन र सामाजिक सद्भाव प्रवर्द्धन गर्ने उद्देश्य रहेको जर्सी वितरणका क्रममा ब्रदर्स एफसीका प्रमुख हरि गुरुङले बताए ।

विदेशमा रहेका नेपाली र स्वदेशमा रहेका नेपालीबीचको सम्बन्धलाई अझ सुदृढ बनाउन यस्ता गतिविधिले महत्वपूर्ण भूमिका खेल्ने उनको भनाइ थियो । ब्रदर्स एफसी हङकङले नेपाली समुदायलाई खेलमार्फत एकताबद्ध गर्ने उद्देश्यका साथ हङकङमा नियमित रूपमा फुटसल प्रतियोगिता, मैत्रीपूर्ण फुटबल खेल तथा विभिन्न सामाजिक गतिविधि सञ्चालन गर्दै आएको छ ।

काठमाडौंमा आयोजित जर्सी वितरण कार्यक्रममा पनि कलाकार, पत्रकार, सञ्चारकर्मी र नेपाली समुदायबीच आत्मीय सम्बन्धलाई विस्तार गर्नुका साथै खेल संस्कृतिको प्रवर्द्ध गर्ने उद्देश्यले मायाको चिनो स्वरुप जर्सी वितरण गरिएको क्लबका प्रमुख गुरुङले बताए ।

कार्यक्रममा कलाकार तथा पत्रकारहरूको तर्फबाट सयोजक सुनिल थापा मगरले क्लबको पहलको स्वागत गर्दै यस्ता गतिविधिले खेलकुदप्रतिको आकर्षण बढाउनुका साथै नेपाल र प्रवासमा रहेका नेपालीबीच आपसी सम्बन्ध अझ सुदृढ बनाउन सहयोग पुग्ने बताए ।

विगत लामो समयदेखि ‘स्वास्थ्यका लागि खेलकुद’ नारा सहित कलाकार, पत्रकार र विभिन्न सञ्चार क्षेत्रमा आवद्ध सञ्चारकर्मीबीच ‘मैदानमा प्रतिष्पर्धा, दिलमा मित्रता’ को भावना सहित फुटसल खेल्दै आईरहेको छ ।