अखबार नेपाल ट्रेन्डिङ

काठमाडौं: अखिल नेपाल फुटबल संघ (एन्फा)  विश्व फुटबल महासंघ (फिफा) को निलम्बनमा परेको छ । फिफा विधानको धारा १४ को उपधारा १(आई) र उपधारा ३ अनुसार तेस्रो पक्षको हस्तक्षेपसँग सम्बन्धित फिफा विधानको उल्लङ्घन भएको ठहर गर्दै एन्फामाथि निलम्बनको निर्णय गरिएको फिफाले जारी गरेको विज्ञप्तिमा उल्लेख छ ।

फिफाले अर्को निर्वाचन नभएसम्म पुरानै कार्यसमितिलाई काम गर्न भनेको थियो । एन्फा कार्यसमितिको असार ६ गते कार्यकाल सकिएको थियो । तेस्रो पक्ष भनेको सरकारको हस्ताक्षेप हो । एन्फाले गत वर्ष चैत १३ गतेका लागि केन्द्रीय निर्वाचन मात्रै गर्ने निर्णय गरेदेखि एन्फा र सरकारबीच विवाद चलेको थियो ।

तहगत निर्वाचनका लागि पटक पटकको निर्देशन अटेर गरेपछि राष्ट्रिय खेलकुद परिषद (राखेप)  ले चैत ११ गते एन्फालाई ३ महिनाको लागि निलम्बन गरेको थियो । पछि राखेपले जेठ १ गते निलम्बन फुकुवा गरेको थियो । एन्फा नेतृत्वले निशर्त निलम्बन फुकुवा भएको दाबी गरेको थियो । जारी विश्वकपको उद्घाटन समारोहमा भाग लिन मेक्सिको जान लागेका एन्फा अध्यक्ष पंकज विक्रम नेम्वाङ र महासचिव किरण राईलाई अध्यागमन विभागले त्रिभुवन अन्तर्राष्ट्रिय विमानस्थलबाट फर्काएको थियो ।

अध्यक्ष नेम्वाङ, पदाधिकारी, सदस्य र कर्मचारी गरि २४ जनालाई राखेपको सिफारिस विदेश जान रोक लगाइएको थियो । सरकार आफै एन्फाको विवादको विषयमा संलग्न पनि भयो। तर विवादको निष्कर्ष निकाल्न सकेन । अन्तत फिफाले एन्फा निलम्बन गरेको‌ छ । निलम्बनसँगै नेपालले अन्तर्राष्ट्रिय प्रतियोगितामा भाग लिन पाउने छैन । नेपालका फिफा मान्यता रेफ्रीहरूले अन्तर्राष्ट्रिय खेल खेलाउन पाउने छैनन् । यस अर्थ यो नेपाली फुटबलको लागि कालो दिन हो‌ ।

सन् १९५१ मा स्थापना भएको एन्फा १९७२ मा फिफाको सदस्य राष्ट्र बनेको थियो । ५ दशक लामो एन्फाको इतिहासमा एन्फा फिफाबाट निलम्बनमा परेको यो पहिलो पटक हो ।