अखबार नेपाल ट्रेन्डिङ

बाँके (कोहलपुर) : इलाका प्रहरी कार्यालय कोहलपुरको सक्रियताका कारण भारतबाट सुनका गहना र नगद चोरी गरेर बाँके जिल्लाको कोहलपुर नगरपालिका-११ मा रहेको होटल न्यू कालीकोटेमा कोठा भाडामा लिई बसेका ६ जना पक्राउ परे । इलाका प्रहरी कार्यालय कोहलपुरबाट प्रहरी निरीक्षक रेशमलाल पौडेलको कमाण्डमा खटिएको ७ जनाको प्रहरी टोलीले होटल न्यू कालीकोटेको कोठा नम्बर ८ बाट उनीहरुलाई पक्राउ गरेको जानकारी इलाका प्रहरी कार्यालय कोहलपुरकी प्रमुख प्रहरी नायब उपरीक्षक लक्ष्मी खनालले दिएकी छिन् ।

पक्राउ पर्नेमा कालीकोट जिल्लाको रासकोट नगरपालिका-१ का मनबहादुर शाही, तेजबहादुर शाही, कालीकोट जिल्लाकै सान्नी त्रिवेणी गाउँपालिका-८ का पंकज केसी, प्रेमबहादुर खत्री, अनिता खत्री, नरहरिनाथ गाउँपालिका-९ की सरिता शाही रहेका छन् । प्रहरीले उनीहरुको साथबाट १५ तोला २५ लाल (पत्थरसहित) सुनका गर-गहना, ७ लाख ८७ हजार नेपाली रुपैयाँसमेत बरामद गरी निजहरु माथि आवश्यक अनुसन्धान गरिरहेको छ ।

प्रहरी नायब उपरीक्षक लक्ष्मी खनालले इलाका प्रहरी कार्यालय कोहलपुरअन्तर्गतका क्षेत्रमा अपराध नियन्त्रण गरी शान्ति-सुरक्षा र अमन-चैन चुस्त-दुरुस्त राख्ने सवालमा कुनै सम्झौता नगर्न आफूमातहतका प्रहरीहरुलाई कमाण्ड सम्हाल्दै अह्राएकी हुन् । प्रहरी नायब उपरीक्षक खनालको त्यहाँ सरुवा हुँदै गर्दा कोहलपुरबासीमा महिला प्रहरी नायब उपरीक्षकको कमाण्डमा कोहलपुरमा थप शान्ति-सुव्यवस्था कायम हुने चर्चा चलेको थियो । तर, प्रहरी नायब उपरीक्षक खनालले भनेकी थिइन्- ‘महिला-पुरुष भन्ने हुँदैन । हाम्रो काम जसरी पनि समाजलाई सुरक्षित राख्ने नै हो ।’

कोहलपुरबासीको सदीक्षालाई साकार पार्न इलाका प्रहरी कार्यालय कोहलपुरकी प्रमुख प्रहरी नायब उपरीक्षक लक्ष्मी खनाल यतिबेला अपराधविरुद्धको निर्मम एक्सनमा छिन् । कुनै पनि किसिमका अपराधका हर्कत सह्य नहुने, त्यसविरुद्ध प्रहरी निर्ममरुपमा प्रस्तुत हुने जनाउ उनले कार्यभार सम्हाल्दै गर्दा दिएकी हुन् । आफ्नो इलाकालाई शान्त र सुरक्षित राख्न प्रहरी नायब उपरीक्षक खनालले देखाएको अग्रसरताको कोहलपुरबासीले खुलेरै प्रशंसा गरेका छन् । समुदायका विभिन्न क्षेत्रको समेत सक्रिय सहभागिता जुटाएर समुदाय-प्रहरी साझेदारीमा समाजलाई शान्त र सुरक्षित राख्न सकिने दृढमान्यताका साथ प्रहरी नायब उपरीक्षक खनाल क्रियाशील रहेको कोहलपुरबासीहरु बताउँछन् ।