अखबार नेपाल ट्रेन्डिङ

काठमाडौं: अष्ट्रेलियालाई २४ रनले हराउँदै भारत आइसिसी टि-२० विश्वकप २०२४ को सेमिफाइनलमा प्रवेश गरेको छ । सोमबार सम्पन्न खेलमा अस्ट्रेलिया २४ रनले पराजित भएको हो । योसँगै अस्ट्रेलियाको सेमिफाइनल पुग्ने सम्भावना कमजोर बनेको छ ।

यस समूहबाट ६ अंकसहित भारत शीर्ष स्थानमा रहेर सेमिफाइनल पुगिसकेको छ । भारतले फाइनल प्रवेशका लागि इङ्ल्यान्डसँग खेल्ने छ । सुपर ‘एट’को अन्तिम खेलमा बंगलादेशले अफगानिस्तानलाई हराए अस्ट्रेलिया सेमिफाइनल पुग्नेछ ।

तीन खेलबाट दुई अंक जोडेको अस्ट्रेलियाको रन रेट ०.२२३ रहेको छ । समान खेलबाट समान अंक जोडेको अफगानिस्तानको रन रेट -०.६५० रहेको छ भने बंगलादेश अंकविहीन रहेको छ । भारतले दिएको २०६ रनको लक्ष्य पछ्याएको अस्ट्रेलियाले निर्धारित २० ओभरमा ७ विकेट गुमाउँदै १८१ रन मात्रै बनाउन सक्यो ।

अस्ट्रेलियाका ओपनर ट्राभिस हेडले सर्वाधिक ७६ रन बनाए । ४३ बल खेलेका उनले ९ चौका र ४ छक्का प्रहार गरे । कप्तान मिचेल मार्स ३७, ग्लेन म्याक्सेवल २० र टिम डेभिड १५ रनमा आउट हुँदा प्याट कमिन्स ११ र मिचेल स्टार्क चार रनमा अविजित रहे । भारतका अर्शदीप सिंहले सर्वाधिक तीन विकेट लिए । कुलदीप यादवले दुई विकेट लिँदा जसप्रीत बुमराह र अक्षर पटेलले समान एक विकेट लिए ।

त्यसअघि टस हारेर पहिला ब्याटिङ थालेको भारतले निर्धारित २० ओभरमा पाँच विकेट गुमाउँदै २०५ रन बनाएको थियो । भारतका कप्तान रोहित शर्माले सर्वाधिक ९२ रन बनाए । ४१ बल खेलेका उनले सात चौका र आठ छक्का प्रहार गरे । सूर्यकुमार यादव ३१, शिवम दुबे २८ र ऋषभ पन्त १५ रनमा आउट हुँदा हार्दिक पाण्ड्या २७ र रविन्द्र जडेजा नौ रनमा अविजित रहे । अस्ट्रेलियाका मिचेल स्टार्क र मार्कस स्टोइनिसले समान दुई विकेट लिए । जोश हेजलवुडको नाममा एक विकेट रह्यो ।