अखबार नेपाल ट्रेन्डिङ

काठमाडौं: क्रिकेटर सन्दीप लामिछानेको मुद्दाको बहस ‘हेर्दाहेर्दै’मा परेको छ । उच्च अदालत पाटनले उनको बलात्कार सम्बन्धी मुद्दा भोलिका लागि हेर्दाहेर्दैमा राखेको हो ।

न्यायाधीशद्वय सुदर्शनदेव भट्ट र अञ्जु उप्रेती ढकालको इजलासमा लामिछानेले दायर गरेको पुनरावेदनमा जवाफी बहस मात्रै बाँकी भएकोले भोलि यही इजलासमा मुद्दाको सुनवाइले निरन्तरता पाउने छ । फैसला भोलि नै आउन सक्नेछ ।

सुरुमा सन्दीप लामिछानेका वकिलले बहस गरेका थिए । त्यसपछि जाहेरीवालका तर्फबाट सरकारी वकिल र नीजि वकिलले बहस गरेका हुन् । यसअघि पाँच पटक पेसी तोकेर पनि फैसला हुन सकेको थिएन ।

गौशाला २६ लाई बलात्कार गरेको मुद्दामा जिल्ला अदालत काठमाडौंले लामिछानेविरुद्ध ८ वर्षको जेल सजाय सुनाएको छ । उक्त फैसलाविरुद्ध सन्दीपले उच्च अदालत पाटनमा पुनरावेदन गरेका हुन् । उता पीडित पक्षका तर्फबाट पनि किशोरी नाबालिग नै रहेको जिकिर गर्दै लामिछानेलाई अझ बढी सजाय हुनुपर्ने माग गरी पुनरावेदन परेको छ ।