अखबार नेपाल ट्रेन्डिङ

काठमाडौं: आर्थिक वर्ष माघको दोस्रो सातासम्म संस्कृति, पर्यटन तथा नागरिक उड्डयन मन्त्रालयको बेरुजु ४ अर्ब २० करोड रुपैयाँ रहेको पाइएको छ । मन्त्रालयको दोस्रो त्रैमासिक समीक्षा र मन्त्रीस्तरीय विकास समाधान समितिको बैठकमा सहसचिव हेमराज तामाङले पेश गरेका हुन् ।

मन्त्रालयका अनुसार सरकारी र समितितर्फको गरी कूल ४ अर्ब २० करोड रुपैयाँ बेरुजु छ । क्यासिनोहरुले रोयल्टी नदिएका कारण १ अर्ब २१ करोड रुपैयाँ असुल उपर गर्न बाँकी रहेकाले बेरुजु बढेको जनाईइको छ । उक्त रकम असुलका लागि मन्त्रालयले पर्यटन विभाग र विभागले सम्बन्धित क्यासिनोहरुमा पत्रचार गरिसकेको छ । कतिपय बेरुजुहरू सार्वजनिक लेखा समितिबाट छलफल भई टुङ्गो नलागेका कारण फर्छ्यौट हुन बाँकी रहेको सहसचिव तामाङले बताए ।

सहसचिव तामाङका अनुसार पुरातत्त्व विभाग र पर्यटन विभाग अन्तर्गतका कार्यालयहरु प्रदेश मन्त्रालय र स्थानीय तहमा हस्तान्तरण भएका कार्यालयहरूको ५ करोड ८७ लाख रुपैयाँ बेरुजु सक्कल स्रेस्ता नहुँदा फर्छ्यौट हुन नसकेको हो । उनले भने, ‘हामीले महालेखापरीक्षकसँग बसेर सम्बन्धित कार्यालयका लेखा हेर्ने अधिकृत र मन्त्रालयको समेत लेखा अधिकृत बसेर स्रेस्ता खोज्ने भएका छौँ । स्रेस्ता फेला परेपछि बेरुजु फर्छयोट हुन्छ ।’  मन्त्रालयका अनुसार समितिहरूतर्फ पशुपति विकास कोषको ७० करोड बेरुजु फर्छ्यौट भएको छैन । केही समितिहरू स्थानीय तह र प्रदेश मन्त्रालयमा हस्तान्तरण भएकाले सकल स्रेस्ताहरू सम्बन्धित स्थानीय  तह र मन्त्रालयमा रहेकाले ४ करोड ६४ लाख रुपैयाँ फर्छ्यौट हुन नसकेको मन्त्रालयले जनाएको छ ।