अखबार नेपाल ट्रेन्डिङ

काठमाडौं: आइसीसी यू-१९ विश्वकपमा आज नेपालले समूह ‘डी’ को दोस्रो खेलमा पाकिस्तानसँऊग भिड्दैछ । यी दुईबीचको खेल नेपाली समय अनुसार दिउँसो १:४५ बजे सुरु हुनेछ ।

नेपाल पहिलो खेलमा न्युजिल्यान्डसँग ६४ रनले पराजित भएको थियो । उक्त खेलमा न्युजिल्यान्डले प्रस्तुत गरेको ३०३ रनको लक्ष्य पछ्याउने क्रममा नेपालले ९ विकेटको क्षतिमा २३८ रन जोडेको थियो । नेपालका लागि अर्जुन कुमालले ९० रनको इनिङ खेलेका थिए ।

यता पाकिस्तानले भने पहिलो खेलमा अफगानिस्तानमाथि १८१ रनको फराकिलो जित निकालेको थियो । सुरुवाती ब्याटिङ गर्दै २८४ रन बनाएको पाकिस्तानले अफगानी टोलीलाई १०३ रनमा अलआउट गरेको थियो ।

नेपालले गत महिना पाकिस्तानविरुद्ध एसीसी यू-१९ एसिया कपमा पनि खेलेको थियो । उक्त खेलमा पाकिस्तान ७ विकेटले विजयी भएको थियो । दुवै टोलीमा त्यसयता खासै परिवर्तन भएको छैन ।

यू-१९ विश्वकप इतिहासमा नेपाल र पाकिस्तान तीन पटक भिडेका छन् । सन् २००० मा खेल रद्द हुँदा २००२ संस्करणमा नेपालले पाकिस्तानलाई स्तब्ध पारेको थियो । सन् २०१६ मा भने पाकिस्तानले १२२ रनको जित निकालेको थियो ।

नेपाल प्रतियोगिताको समूह ‘डी’ मा रहेको छ । समूहमा नेपालसँगै न्युजिल्यान्ड, पाकिस्तान र अफगानिस्तान पनि रहेका छन् । समूहको शीर्ष ३ स्थानमा रहने टोलीले सुपर ६ को यात्रा तय गर्नेछन् । त्यसपछि समूह ‘ए’ का टोलीले समूह ‘डी’ तथा समूह ‘बी’ र समूह ‘सी’ को टोलीले एक अर्कासँग खेल्नेछन् ।

सुपर सिक्सको दुई समूहको शीर्ष टोलीले भने सेमिफाइनलमा खेल्नेछन् । समूहमा पुछारका टोलीले पनि स्थान निर्धारणका लागि खेल्नेछन् ।