अखबार नेपाल ट्रेन्डिङ

काठमाडौं: नेपाल सुपर लिग (एनएसएल) अन्तर्गत आज भएको पहिलो खेलमा पोखरा थन्डर्ससँग इन्जुरी समयमा गोल खाएपछि धनगढी एफसी एनएसएलको शीर्ष स्थानमा पुग्नबाट चुकेको छ ।

पोखराका मोसे ग्याबाहले इन्जुरी समयमा गोल गरेपछि धनगढी १-१ को बराबरीमा रोकियो । यो बराबरीले पोखरा शीर्ष स्थानमा रहँदै क्वालिफायरमा पुगेको छ । पोखराले ८ खेलमा ४ जित, ३ बराबरी र १ हार सहित १५ अंकमा पहिलो चरण टुङगायो ।

धनगढीको कुल ८ खेलमा ३ जित, ४ बराबरी र १ हारसंगै १३ अंक बनायो । धनगढीले भने आफ्नो अन्तिम वरियता थाहा पाउन बाँकी खेलको परिणाम कुर्नुपर्ने भएको छ । झापा एफसीले आजको दोस्रो खेलमा एफसी चितवन विरुद्ध जित हासिल गरेमा हेड टू हेडका आधारमा धनगढीलाई उछिन्दै दोस्रो स्थान हासिल गर्नेछ । यस्तै भोलिको खेलमा ललितपुर सिटी एफसीले काठमाडौंविरुद्ध जित हासिल गरेपनि धनगढी भन्दा अघिल्लो स्थानमा रहँदै यस चरण अन्त्य गर्ने छ ।

आजको खेलमा दुवै टोलीका लागि गोल गर्ने थुप्रै अवसरहरू थिए । तर दुवै टोली जित भने निकाल्न असफल रहे । खेलको ४२औं मिनेटमा धनगढीले खेलमा अग्रता लियो । धनगढीका लागि मिलान राईले गोल गरे । खेलको ९०औं मिनेटमा मोसेस ग्याबाले पोखराका लागि बराबरी गोल गरे ।

आजको दोस्रो खेलमा झापा एफसी र एफसी चितवन भिड्ने छन् । चितवन प्लेअफ दौडबाट बाहिरिसकेको छ भने झापाको प्लेअफ सम्भावना कायमै छ ।