अखबार नेपाल ट्रेन्डिङ

काठमाडौं: काठमाडौंमा दुर्लभ वन्यजन्तु सालकको कपटा बेच्न लागेका तीनजनालाई प्रहरीले पक्राउ गरेको छ । पक्राउ पर्नेमा दोलखाको गौरीशंकर गाउँपालिका-१ की २० वर्षीया अमृत लामा, दोलखाको जिरी नगरपालिका-३ का २५ वर्षीय विशाल बस्नेत र सोही नगरपालिका-४ का २७ वर्षीय सुकवीर तामाङ रहेका छन् ।

काठमाडौं महानगरपालिका-३२ पेप्सीकोलामा दुर्लभ वन्यजन्तु सालकको खपटा बेचबिखन गर्न हिँडिरहेका छन् भन्ने गोप्य सूचनाको आधारमा काठमाडौं उपत्यका अपराध अनुसन्धान कार्यालयबाट खटी गएका प्रहरी टोलीले चेक जाँच गर्ने क्रममा उनीहरुलाई पक्राउ गरेको हो ।

उनीहरुको साथबाट ४४ ईन्च लम्बाई, २१ ईन्च चौडाई रहेको खुट्टाको नंग्रा सहितको सालकको खपटा/छाला जस्तो देखिने वस्तु बरामद भएको प्रहरीले जनाएको छ । पक्राउ परेकाहरूलाई आवश्यक कारबाहीको लागि डिभिजन वन कार्यालय हात्तिसार पठाइएको छ ।