अखबार नेपाल ट्रेन्डिङ

काठमाडौं: सरकारी स्वामित्वको खाद्य व्यवस्था तथा व्यापार कम्पनीले दसैंका लागि भनेर यो वर्ष उपत्यकामा करिव ५० हजार बोका-खसी बिक्री गर्ने तयारी रहेको छ । कम्पनीले ४५ हजार बोका-खसी र करिव ५ हजार च्याङ्ग्रा उपत्यकामा ल्याउन लागेको जनाएको छ ।

विभिन्न जिल्लाबाट ल्याईने बोका-खसी बागबजार टुकुचा, भक्तपुर सल्लाघारी, बालाजु लगायतका ठाउँबाट बिक्री गर्ने तयारी गरेको जनाईएको छ । दसैंमा धेरै मासु खाने चलन रहेकाले स्वास्थ्य परीक्षण गरेर मात्र बिक्री गर्न अनुमति दिएको पशु क्वारेन्टाइनले जनाएको छ ।

रोगी बोका-खसी बेच्न नपाउन भनेर चेकजाँच गरेर बिक्री गर्ने तयारी छ । उपत्यका प्रवेश गर्ने नाकामा पशु चिकित्सक राखेर जाँच गरिएको पशु क्वारेन्टाइन काठमाडौंले जनाएको छ । कमी कमजोरी हुन नदिन उपत्यका प्रवेश गर्ने नाकामा चेकजाँच गरिनेछ ।

गुणस्तहीन मासु लगायत वस्तुको बिक्री वितरण निरुत्साहित गर्न खाद्य प्रविधि तथा गुण नियन्त्रण विभाग, आपूर्ति व्यवस्था तथा उपभोक्ता हित संरक्षण विभागले पनि टोली परिचालन गर्ने जनाएका छन् ।