अखबार नेपाल ट्रेन्डिङ

लन्डन: ब्रिटिश गोर्खा सैनिकहरूको कथामा निर्मित नेपाली कथनाक चलचित्र ‘गोर्खा वारियर’ एक भव्य समारोहबीच लन्डनमा वर्ल्ड प्रिमियर गरिएको छ ।

लन्डनको केन्द्र लेष्टर स्क्वायरस्थित आइम्याक्स सिनेमा हलमा गरिएको रेड कार्पेट प्रिमियरमा ७ सय बढी दर्शकले चलचित्र हेरेका थिए । बलिउड र हलिउडका चलचित्रहरू प्रदर्शन हुने बेलायतको प्रतिष्ठित सिनेमामा कुनै नेपाली चलचित्रको प्रिमियर गरिएको सम्भवत: यो नै पहिलो अवसर हो ।

सिनेमाको प्रिमियरअघि चलचित्रका कलाकार तथा प्राविधिक टीम र विशेष अतिथिहरूलाई रेड कार्पेटमा स्वागत गरिएको थियो । सो अवसरमा ब्रिगेड अफ गोर्खाजको ब्यान्ड र पाइपरबाट विशेष म्यूजिकल प्रस्तुति गराइएको थियो ।

सेन्ट्रल लन्डनको अत्याधिक व्यस्त लेष्टर स्क्वायरको केन्द्रमा बाजागाजा र तामझामसहित नेपाली चलचित्र प्रदर्शन भइरहंदा त्यहां घुम्न आएका सयौं पर्यटक एवम् विदेशीहरुको प्रशस्त ध्यान खिचिएको देखिन्थ्यो । ‘गोर्खा वारियर’ को लन्डन वर्ल्ड प्रिमियरपछि चलचित्रका निर्देशक मिलन चाम्सले आफ्नो दुई दशकदेखिको प्रयास सफल बनेको महशुस् गरेको बताएका छन् ।

चाम्सद्वारा निर्देशित गोर्खा वारियरले बेलायतको लागि मलायाका जंगलमा गोर्खा सैनिकहरूले लडेको ७० वर्षअघिको युद्धलाई पर्दामा उतारेका छन् । युद्धका क्रममा गोर्खाले व्यहोरेका सास्ती, देखाएको वीरता र नेपालमा रहेका परिवारसँगको कारुणिक वियोगका बाध्यताहरुलाई चलचित्रले चित्रण गरेको छ ।

चलचित्रमा पूर्वगोर्खा रितेश चाम्सको प्रमुख भूमिका छ भने विजय लामा, रेविका गुरुङ, रियर राई, शिशिर बाङ्देल लगायतका कलाकारले पनि अभिनय गरेका छन् । निर्माता सुमन राई र सुस्मिता वाइबा तथा सहनिर्माता सुरेश राई र कार्यकारी निर्माता प्रशान्त थापा छन् ।

गोर्खा वारियर आगामी चैत महिनाभित्रै नेपाल र विदेशमा एकसाथ प्रदर्शनमा ल्याउने तयारी रहेको गोर्खा वारियरका मिडिया संयोजक आकाश सुनुवारले जानकारी दिए ।