अखबार नेपाल ट्रेन्डिङ

पोखराः कास्की प्रहरीले आज बिहान एक महिलाले  भित्री वस्त्रभित्र लुकाएको २८० ग्राम २९ मिलिग्रामको सुनको बिस्कुट र औंठी बरामद गरेको छ ।

बैदाम प्रहरी प्रमुख डीएसपी वेदप्रकश जोशीका अनुसार काठमाडौंबाट पोखरा आएको ग १ ख ९९४४ नम्बरको बसमा यात्रारत काठमाडौं जोरपाटी बस्ने ४५ वर्षीया कल्पना गुरुङबाट सो सुन बरामद गरेको हो । विशेष सूचनाका आधारमा पोखरा बसपार्क पुगेर बसबाट झर्नासाथ ती महिलाको शरीर खानतलासी गर्दा ‘सुनजस्तो देखिने’ धातु भेटिएको उनले बताए ।

डीएपी जोशीका अनुसार महिलाले प्रारम्भिक बयानका क्रममा काठमाडौंको एक व्यक्तिले निश्चित रकम दिएर सुन पोखरा लैजान भनेको र सोही अनुसार आफू सुन बोकेर पोखरा आएको बताएकी छन् ।

‘पोखरा पुगेपछि एउटा फोन आउँछ, उसैलाई सुन दिनू भनेका थिए,’ ती महिलालाई उदृत गर्दै डीएसपी जोशीले भने, ‘हामीले फोन कुर्‍यौं तर ती महिलाको मोबाइलमा फोनचाहिँ आएको छैन । अब हामी यो धातु राजश्व अनुसन्धान विभागलाई सुम्पन्छौँ ।’

महिलाबाट बरामद सुन पोखराको कुनै सुनचाँदी व्यवसायीका लागि कसैले पठाएको र यो उपक्रम लामो समयदेखि चलिरहेको हुनसक्ने प्रहरी स्रोतको भनाइ छ । पोखरामा सुनको माग अत्यधिक छ । तर, नेपाल राष्ट्र बैंकले दैनिक १० किलोग्राम सुनमात्र बजार पठाउँछ । त्यसको थोरै मात्रा मात्र पोखरा आइपुग्छ ।

प्रहरीले यसअघि पनि बसयात्रीबाट पटकपटक सुन बरामद गरेको छ।  तीजलगायतका चाडबाडमा सुनको माग अत्यधिक हुन्छ।