अखबार नेपाल ट्रेन्डिङ

काठमाडौं: भारतमा जारी १४औं संस्करणको साफ च्याम्पियनसिपमा बंगलादेशलाई १–० गोल अन्तरले पराजित गर्दै कुवेत फाइनलमा प्रवेश गरेको छ ।

निर्धारित ९० मिनेटको समय खेल गोलरहित बराबरीमा टुंगिएपछि खेल थप समयमा गएको थियो । कुवेतका लागि थप समयको पहिलो हाफको इन्जुरी समयमा अब्ददुल्ला अल्ब्लोसीले गरेको गोल नै खेलको निर्णायक बनेपछि कुवेत उपाधि नजिक पुगेको हो ।

पहिलो सहभागितामा फाइनल पुगेका कुवेतले अब फाइनलमा भारत र लेवनानमध्ये एकको सामना गर्ने पक्का भएको छ । आयोजक भारत र लेबनानबीचको खेल साँझ ७:४५ बजे दोस्रो सेमिफाइनलमा प्रतिस्पर्धा हुनेछ ।

समूह ‘ए’बाट कुवेत समूह विजेता र भारत उपविजेताका रुपमा अन्तिम चारमा पुगेका थिए । नेपाल र पाकिस्तानलाई हराएका कुवेत र भारतबीचको खेल भने १–१ को बराबरीमा टुंगिएको थियो । प्रतियोगिताबाट बाहिरिसकेको दुई टोलीबीचको खेलमा भने नेपालले पाकिस्तानलाई १–० हराएको थियो ।

अर्को समूह ‘बी’ बाट माल्दिभ्स र भुटान बाहिरिएका थिए । समूह चरणमा लेवनानले सबै ३ खेल जितेको थियो भने बंगलादेशले माल्दिभ्स र भुटानलाई समान ३–१ ले हराएको थियो । लेवनान समूह विजेता र बंगलादेश उपविजेताका रुपमा अन्तिम चारमा पुगेका हुन् । दक्षिण एसियाको प्रतिष्ठित साफमा पहिलो पटक यो क्षेत्र बाहेकका कुवेत र लेवनानले सहभागिता जनाएका हुन् ।