अखबार नेपाल ट्रेन्डिङ

काठमाडौं: नेपाली कांग्रेसका नेता डा. सशांक कोइरालाले संविधान र लोकतन्त्रको रक्षा पत्रकारले गर्नुपर्ने बताएका छन् ।

आइतबार नेपाल प्रेस युनियन काठमाडौं शाखाको नवौं अधिवेशनलाई सम्बोधन गर्दै कोइरालाले संविधानमाथि धेरै प्रहार भइरहेको भन्दै यसको रक्षा पत्रकारहरुले गर्नुपर्ने बताएका हुन् ।

७० वर्ष लगाएर संविधानसभाबाट ल्याएको संविधानमाथि प्रहार भइरहेकाले त्यसको रक्षाका लागि पत्रकारहरुले सचेततापूर्वक समाचार सम्प्रेषण गरेर खबरदारी गर्नुपर्ने उनको भनाई छ । तरबार भन्दा कलम बलियो हुने भन्दै कोइरालाले पत्रकारको कलम संविधान र व्यवस्था रक्षाका लागि चलाउनुपर्ने आवश्यक रहेको बताए । उनले भने ‘७० वर्ष लामो संघर्षपछि लोकतान्त्रिक संविधान जारी भएको छ । संविधानसभाबाट बनेको यो संविधानमाथि ‘कु’ गर्ने खतरा बढ्दै गएको छ । यसको रक्षाका लागि सबै पत्रकारहरुले तरबार भन्दा बलिया आफ्ना कलम चलाउनुपर्छ ।’

साथै नेपाली कांग्रेसलाई सच्चिन खबरदारी गर्नुपनि प्रेस युनियनसम्बद्ध पत्रकारहरुको काम भएको उनले बताए । कांग्रेसलाई पुनः जीवन दिन आवश्यक रहेको भन्दै नेता कोइरालाले पार्टी छियाछिया भएकाले शुभेच्छुक संस्थाको हैसियतले युनियनले पार्टीको नेतृत्वलाई खबरदारी गर्नुपर्ने कोइरालाको भनाई छ ।

लोकतन्त्र र संविधानको रक्षाका लागि कांग्रेसलाई एकतावद्ध बनाएर बलियो पार्टी बनाइराख्न प्रेसको भूमिका महत्वूर्ण हुने उनले विश्वास व्यक्त गरे ।