अखबार नेपाल ट्रेन्डिङ

काठमाडौं: राष्ट्रपति रामचन्द्र पौडेललाई थप उपचारका लागि आज भारत लगिँदैछ । चिकित्सकको सल्लाहमा राष्ट्रपति पौडेललाई थप उपचारका लागि भारत लैजान लागिएको सचिवालयले जनाएको छ ।

छातीमा संक्रमण भएपछि बिरामी परेका राष्ट्रपति पौडेललाई एयर एम्बुलेन्समार्फत् भारत लैजान लागिएको उहाँका निजी सचिव चिरञ्जिवी अधिकारीले जानकारी दिए ।

उनका अनुसार राष्ट्रपति पौडेललाई नयाँ दिल्लीस्थित अल इण्डिया इन्स्टिच्युट आफ मेडिकल साइन्सेस (एम्स) मा लगिनेछ । उनका साथमा चिकित्सकसहित श्रीमती, छोरा लगायतको टोली जाने अधिकारीले बताए । राष्ट्रपति पौडेलको स्वास्थ्यमा एक सातादेखि समस्या देखिएको हो ।

गत साता उहाँ त्रिवि शिक्षण अस्पतालमा तीन दिन भर्ना भएर उपचार गराएका थिए । सोमबार ‘फलोअप’का लागि गएका पौडेलको छातीमा जमेको पानी निकालेर परीक्षण गर्दा संक्रमण भएको पाइएको थियो । मंगलबार फेरि असहज भएपछि उहाँलाई त्रिवि शिक्षण अस्पताल लगिएको थियो ।