अखबार नेपाल ट्रेन्डिङ

काठमाडौं: आइसीसी विश्वकप लिग-२ त्रिकोणात्मक एक दिवसीय सिरिजमा पपुवा न्यू गिनी (पीएनजी)लाई ९ विकेटले हराउँदै नेपालले कीर्तिमानी जित निकालेको छ ।

लिग-२ को अन्तिम खेलमा नेपालले युएईलाई पराजित गरे सोझै विश्वकप छनोट खेल्नेछ । पिएनजीले दिएको ९६ रनको झिनो लक्ष्य नेपालले ७.४ ओभरमा १ विकेटको क्षति भेट्टायो ।

ओपनर कुशल भुर्तेल र आशिफ शेखले ५१ रनको साझेदारी गर्दै नेपाललाई आक्रामक सुरुवात गरेका थिए । कुशल भुर्तेल ३३ रन बनाउँदा एलबीडब्लु धरापमा परे । कुशलले १४ बलमा ४ चौका र २ छक्का प्रहार गरे । आशिफ शेख ५३ र कुशल मल्ल १२ रनमा नटआउट रहे ।

कीर्तिपुरस्थित त्रिवि क्रिकेट मैदानमा घरेलु टोलीले टस जितेर फिल्डिङ रोजेपछि ब्याटिङ गरेको पिएनजीले ३२ ओभरमा ९५ रन बनाउँदा अलआउट भयो ।

पीएनजीलाई कम स्कोरमा नेपालका सन्दीप लामिछाने एक्लैले ५ विकेट लिए । सन्दीपले आफ्नो स्पेलमा १ मेडन राख्दै २५ रन खर्चे ।

ललित राजवंशीले २ विकेट झारे । ललितले ७ ओभरमा १ मेडन राख्दै १३ रन दिए । कुशल मल्लले २ विकेट झारे। सोमपाल कामीको नाममा एक विकेट रह्यो ।

स्पिनर सन्दीप लामिछानेले सेसे बाउलाई १८ रनमा बोल्ड आउट गराए । हिरि हिरी १४ रन बनाउँदा सोमपाल कामीको बलमा करण केसीको हातबाट क्याच आउट भए ।

अर्का ओपनर किपलिन डोरिगा २ रनमा ललित राजवंशीको बलमा बोल्ड आउट भए । कप्तान असद भाला २० रन बनाउँदा सन्दीपको बलमा ललितको हातबाट क्याच आउट भए ।

चार्ल्स अमिनी १६ रनमा सन्दीपको बलमा ललितकै हातबाट क्याच आउट भए । रिले हेकुरे ४ रन बनाउँदा ललितको बलमा क्याच आउट भए ।

नोर्मान भनुवा शुन्य रनमा कुशल मल्लको बलमा दिपेन्द्रसिंह ऐरिको हातबाट क्यच आउट भए। हिला भनुवा ७ रन बनाउँदा सन्दीपको बलमा बोल्ड आउट भए । कवुवा मोरिया १ रन बनाउँदा कुशल मल्लको बलमा भिम सार्कीबाट क्याच आउट भए ।