अखबार नेपाल ट्रेन्डिङ

काठमाडौं: आगामी मंसिर ४ गते प्रतिनिधि सभा र प्रदेश सभाको सदस्य निर्वाचनका लागि उम्मेदवारी दर्ता भएसँगै सुरक्षा व्यवस्था पनि कडा पारिएको छ ।

गृह मन्त्रालयको निर्वाचन लक्षित एकीकृत सुरक्षा योजना अन्तर्गत नेपाली सेना, सशस्त्र प्रहरी बल, नेपाल प्रहरी तथा राष्ट्रिय अनुसन्धान विभाग संयुक्त रूपमा परिचालन भएका छन् ।

निर्वाचन सुरक्षा रणनीति अनुसार एक लाख १५ हजार म्यादी प्रहरीसहित करिब तीन लाख सुरक्षाकर्मी परिचालन हुनेछन् ।

आइतबार उम्मेदवारी दर्ता भएसँगै मुख्य निर्वाचन अधिकृत र निर्वाचन अधिकृतको कार्यालयसहितको सुरक्षाका लागि देशभर सशस्त्र प्रहरी बल परिचालन गरिएको मन्त्रालयले जनाएको छ ।

मन्त्रालयले सबै जिल्लामा प्रमुख जिल्ला अधिकारीमार्फत परिपत्र गरी सुरक्षा संयन्त्र प्रभाककारी बनाउनका लागि निर्देशन दिएको छ ।