अखबार नेपाल ट्रेन्डिङ

काठमाडौं: आगमी मंसिर ४ गते हुने संघ र प्रदेशको निर्वाचनमा नुवाकोट लिखु गाउँपालिका-२ का डोलबहादुर घलेले क्षेत्र नं १ को प्रदेश ‘ख’ मा स्वतन्त्र उम्मेदवारी दिने घोषणा गरेका छन् ।

घलेले शिर्ष दललाई चुनौती दिँदै स्वतन्त्र उम्मेदवारी दिएका हुन् । उम्मेदवारी घोषणासँगै ४० वर्षिय घलेले आफ्नो मुख्य एजेण्डा भ्रष्टाचार अन्त्य गर्नु रहेको बताएका छन् ।

दुई नगरपालिका र १० गाउँपालिका सहित १२ स्थानीय तह रहेको नुवाकोटको निर्वाचन क्षेत्र नं १ को प्रदेश ‘ख’ मा तीन वटा गाउँपालिका छन् ।

लिखु, सुर्यगढी, ककनी र पञ्चकन्या गाउँपालिकाको वडा नं १, २, ५ (२२ वटा वडा) नुवाकोट निर्वाचन क्षेत्र नं १ को प्रदेश ‘ख’ मा रहेका छन् ।

घले यसभन्दा अगाडि कुनैपनि राजनैतिक पार्टीको कुनै पदमा समेत नरहेकाले निस्वार्थ रुपमा दललाई सहयोग गरिरहे ।

तर दलका नेताले आफू लगाएत आफू जस्ता कयौँ युवालाई झिनो आश्वासनमा प्रयोग मात्र गर्ने गरेकाले अब परिवर्तन आफैले गर्नु पर्छ भन्ने उदेश्यका साथ चुनावी माहोलमा होमिएका छन् ।

दश वर्ष नेपाली सेनाको ‘स्पेशल फोर्स’ मा काम गरेका घले अहिले निर्माण व्यवसायी हुन् । उनी हाल विदुर नगरपालिका-४ मा अस्थायी बसोवास गर्दै आएका छन् ।

राजनीतिमा युवा पुस्ताको आवश्यकता महशुस गर्दै युवा पुस्ताको साथ र सहयोगमा आफूले उम्मेदवारी घोषणा गरेको उनले बताए । कुनैपनि दल वा व्यक्तिले समाजलाई बिकास र उन्नतीको बाटोमा लैजान नचाहेको हुँदा अब आफै उम्मेदवार भई गाउँ समाजको बिकास र उन्नतीमा आफ्नो जीवन समर्पण गर्न चाहेको घलेले बताए ।

राजनीतिलाई नेताहरुले पेशा बनाएका र आफुले सुरु गर्ने अबको राजनीतिक बाटो यो क्षेत्र पेशा वा कमाई गर्ने थलो नभई समाज सेवाको रुपमा रहेको स्थापित गर्ने आफ्नो अठोट रहेको उनले बताए ।

राजनीतिलाई पेसा होईन समाजसेवा बनाउनुपर्ने मान्यता घलेको रहेको छ । सोही अनुसार आगामी दिनमा निरन्तर आफूले समाजको लागि राजनीति गर्ने उनले बताए ।