अखबार नेपाल ट्रेन्डिङ

काठमाडौं: पूर्व प्रधानमन्त्री जसपा संघिय परिषद् अध्यक्ष डा. बाबुराम भट्टराई र रेशम चौधरीबीच डिल्लीबजारस्थित कारागारमा भेटवार्ता भएको छ ।

शनिबार बिहानै चौधरीलाई भेट्न कारागार पुगेका भट्टराईले टिकापुर घटना राजनैतिक घटना रहेको भन्दै सरकारले त्यही ढंगले निरुपण गर्नुपर्ने बताएका थिए ।

भट्टराईलाई चौधरीले टिकापुर घटनामा निर्दोष थारुहरुलाई फसाइएको गुनासो गरेका थिए । उनीहरु दुबैबीच करिब ४५ मिनेट भेटवार्ता भएको थियो ।

२०७२ साल भदौ ७ गते टिकापुर घटना ८ प्रहरी र १ नाबालकको ज्यान गएको थियो । उक्त घटनामा जिल्ला अदालत र उच्च अदालतले रेशम चौधरीलाई दोषी ठहर गरेको छ । चौधरीले भने आफू निर्दोष रहेको बताउँदै आएका छन् ।

आज भट्टराईसँगको भेटघाटमा पनि चौधरीले त्यही प्रष्ट पारेका थिए । आज भट्टराईको जन्मदिन समेत परेको थियो । चौधरीले भट्टराईलाई जन्मदिनको शुभकामना समेत दिएका थिए ।

जेलभित्र रहेका रेशम चौधरीलाई भेट्न हिजो मात्र सिके राउत पुगेका थिए ।

भेटमा भट्टराई र चौधरीसँगै नागरिक उन्मुक्ति पार्टीकी अध्यक्ष रन्जिता श्रेष्ठ पनि सहभागी थिइन । उनी चौधरीको धर्मपत्नी हुन् ।