अखबार नेपाल ट्रेन्डिङ

काठमाडौं: स्थानीय तहको निर्वाचनका लागि अहिले प्रधानमन्त्री निवास बालुवाटारमा सत्ता गठबन्धन दलको बैठक जारी छ ।

प्रधानमन्त्री शेरबहादुर देउवाको आह्वानमा पाँच दलीय सत्तारुढ गठबन्धनको बैठक बालुवाटारमा बसेको हो ।

आगामी वैशाख ३० गतेका लागि तय भएको स्थानीय तह निर्वाचनमा सिट बाँडफाँटको विषयमा छलफल भईरहेको छ ।

यसअघि सत्ताको नेतृत्व गरेको दल नेपाली कांग्रेसले स्थानीय तहको आवश्यकताका आधारमा गठबन्धन गरेर जाने निर्णय गरिसकेको छ।गठबन्धनका नेताहरु आ-आफ्नो अडानमा कायम रहेपछि महानगर र उपमहानपालिकाहरुको भागबण्डा टुंगो लागेको छैन ।

अब केही दिनपछि मनोनयन गर्ने मिति आउँदैछ । त्योभन्दा अगाडी उम्मेदवार चयन गर्नुपर्ने बाध्यता सत्तागठबन्धनमा रहेका दललाई रहेको छ ।

यसैबीच  नेपाल कम्युनिष्ट पार्टी (माओवादी केन्द्र) केन्द्रीय कार्यालयका इन्चार्ज पूर्व स्थायी कमिटीका सदस्य वर्षमान पुनले सत्ता गठबन्धनमा सिट बाँडफाँटको आज टुङ्गो लाग्ने बताएका छन् ।

नेता पुनले गठबन्धनमा नगरपालिका र गाउँपालिकाको सिट बाँडफाँट पनि मिलाउने कोशिस भइरहे पनि मिल्न नसके गठबन्धनभित्रै पनि प्रतिस्पर्धा हुने जानकारी दिए ।

उनले भने, ‘नगर र गाउँपालिका पनि माथिबाटै मिलाउन कोशिस गरेका छौँ । नमिले गठबन्धनबाटै हामी प्रतिस्पर्धा गछौं, महानगरको र उपमहानगरको भने आज टुङ्गो लाग्छ ।’