अखबार नेपाल ट्रेन्डिङ

एजेन्सी: स्पेनिस ला लिगा फुटबलमा रियल मड्रिडले सेभियालाई ३-२ गोल अन्तरले पूनरागमन जित निकालेको छ ।

रियलले दुई गोलले पछि परेको अवस्थामा घरेलु टोली सेभियामाथि ३–२ को पूनरागमन जित निकालेको हो ।

रियलको पूनरागमन जितमा रोड्रिगो, नाचो फर्नान्डेस र बेन्जेमाले गोल गरे । घरेलु टोली सेभियाका इभान राकिटिच र एरिक लमेलाले गोल गरे ।

खेलको २१औं मिनेटमा इभान राकिटिचले सिधै फ्रिकिकमा गोल गर्दै सेभियालाई सुरुवाती अग्रता दिलाएका थिए ।

२५औं मिनेटमा एरिक लमेलाले जेसस कोरोनाको पासमा गोल गरेपछि रियल पहिलो हाफमा २–० ले पछि परेको थियो ।

पहिलो हाफमा पछि परेको रियलले दोस्रो हाफको ५०औं मिनेटमा रोड्रिगोज र खेलको ८२औं मिनेटमा नाचो फर्नान्डेसले गोल गर्दै खेललाई २–२ गोलको बराबरीमा ल्याए ।

बराबरीतर्फ धकेलिएको खेलको अतिरिक्त समयको थप गरिएको दोस्रो मिनेटमा रियलका लागि कप्तान करिम बेन्जेमाले गोल गर्दै पूनरागमन जित दिलाए ।

जारी सिजनको ला लिगामा बेन्जेमाको यो २५औं गोल हो । २८ खेल खेलेका उनले ११ असिस्ट समेत दिएका छन् ।

जितसँगै रियलले यो सिजनको ला लिगा जित्ने सम्भावना बलियो बनाएको छ । रियलले दोस्रो स्थानको टोलीलाई १५ अंकले पछि पारेको छ ।

रियलको ३२ खेलबाट ७५ अंक पुगेको छ । दुई खेल कम खेलेको बार्सिलोना र समान खेल खेलेको सेभिया र एट्लेटिको म्याड्रिडको समान ६० अंक छ ।

रियलसँग पराजित भएको सेभियाले दोस्रो स्थानमा उक्लने मौका गुमाएको छ ।