अखबार नेपाल ट्रेन्डिङ

एजेन्सी: उत्तर कोरियाले क्रिप्टोकरेन्सी मार्फत लाखौं डलर चोरी गरेर मिसाइल कार्यक्रममा प्रयोग गर्ने गरेको आरोप लागेको छ ।

संयुक्त राष्ट्र सङ्घको एक प्रतिवेदनले उत्तर कोरियाली ह्याकरले क्रिप्टोकरेन्सीमार्फत लाखौँ डलर चोरी गरेको र त्यसलाई देशको क्षेप्यास्त्र विकासमा लगाउने गरेको दाबी गरेको हो ।

सन् २०२० र २०२१ बीचको अवधिमा ह्याकरले ५ करोड डलरभन्दा बढी डिजिटल सम्पत्ति चोरी गरेको प्रतिवेदनले देखाएको बीबीसीले जनाएको छ ।

पछिल्लो समय यस्तै स्रोतबाट उत्तर कोरियाले क्षेप्यास्त्र कार्यक्रमका लागि रकम जुटाउने गरेको दाबी पनि गरिएको छ ।

उत्तर कोरियाले गर्ने गरेको ह्याकिङसम्बन्धी अध्ययन प्रतिवेदन गएको शुक्रवार राष्ट्रसङ्घीय नाकाबन्दी कमिटीलाई बुझाइएको छ ।

ह्याकरले अमेरिका, युरोप र एसियाका कम्तीमा तीन वटा क्रिप्टोकरेन्सीमाथि निसाना लगाउने गरेको पनि प्रतिवेदनमा उल्लेख छ ।