तीन सयौं पृथ्वीजयन्तीको अवसरमा गोरखादेखि काठमाडौंसम्म सेनाको एकीकरण मार्ग पदयात्रा काठमाडौं आईपुग्यो
वि.सं.२०७८ पुस २६ सोमवार १६:४२
काठमाडौं: तीन सयौं पृथ्वीजयन्तीको अवसरमा ऐतिहासिक ‘गोरखा-धादिङ्ग-नुवाकोट-काठमाडौं एकीकरण मार्ग पदयात्रा २०७८’ पदमार्गमा रहेको नेपाली सेनाको टोली काठमाडौं आइपुगेको छ ।
पदयात्रामा बाजागाजा सहित पृथ्वीनारायण शाहकालीन नेपाली सेनाको पोशाकमा सजिएका रिपुमर्दन गणको १० जना सेनासहित ४० जनाले पदयात्रा सुरु गरेका नेपाली सेना काठमाडौं आईपुगेको हो ।
आज पुष २६ गते (सोमबार) विहान श्री शम्शेर दल गण नागार्जुनले नुवाकोटको ककनीबाट टोलीको हस्तान्तरण लिँदै पाँचमाने, भुवनेश्वर मन्दिर, तीनपिप्ले हुँदै मुडिखुगढी आइपुगेको थियो ।
पदयात्रामा नेपाली सेनाले गोरखा दरबारबाट राष्ट्रिय एकताको प्रतिक नेपालको राष्ट्रिय झण्डा र टर्च लगायत नेपाली सेनाको प्रथम पाँच वटा युनिटहरुको झण्डा काठमाडौं ल्याइपुर्याएको छ ।
नेपाली सेनाले राष्ट्र निर्माता पृथ्वीनारायण शाहले नेपाल एकीकरण गर्ने क्रममा प्रयोग गरेको एकीकरणको बाटो हिंडेर एकताको सन्देश दिएको शम्शेरदल गणका प्रमुख सेनानी उमेश श्रेष्ठले बताउनुभयो ।
आज पुष २६ गते (सोमबार) नुवाकोट जिल्लाको ककनीबाट आएको शम्शेरदल गणको टोलीले हनुमानढोकामा रहेको शार्दुलजंग गुल्मलाई गोरखा दरबारदेखि ल्याएको राष्ट्रिय एकताको प्रतिक नेपालको राष्ट्रिय झण्डा र टर्चका साथै नेपाली सेनाको प्रथम पाँच वटा युनिटहरुको झण्डा हस्तान्तरण गरिने शम्शेरदल गणका प्रमुख सेनानी उमेश श्रेष्ठले बताउनुभयो ।
सैनिक पदयात्रा टोलीलाई काठमाडौंको तारकेश्वर नगरपालिका–३ पाँचमानेगढीमा जनप्रतिनिधि र स्थानीयवासीले माला र खादा लगाएर स्वागत गरेका थिए ।
पदयात्रामा रहेको टोलीले ल्याएको नेपालको झण्डा, टर्च र नेपाली सेनाको झण्डा पृथ्वीनारायण शाहको जन्मजयन्तीको अवसरमा मंगलबार प्रधान सेनापतिलाई हस्तान्तरण गर्ने कार्यक्रम रहेको छ ।
गोरखाबाट धादिङ, नुवाकोट हुँदै काठमाडौंबाट काभ्रेसम्मको करीव १ शय ९२ किलोमिटर बाटोलाई सरकारले एकिकरण पदमार्गको रुपमा प्रवर्द्धन गर्न लागेको छ ।
नेपाली सेनाको गोरखास्थित गणले भने गोरखा जिल्लाभित्रको बाटोको अध्ययन गरेको छ । गोरखा दरवारबाट पिपलथोक, ताप्लेकोट, अश्राङ हुँदै बोर्लाङघाटसम्मको बाटोको प्रारिम्भक अध्ययन गरि स्थानीय सरकारसँगको सहकार्यमा पदमार्ग सुधारको काम पनि शुरु गरिएको सेनाले जनाएको छ ।
राष्ट्रनिर्माता पृथ्वीनारायण शाहले नेपाल एकीकरण गर्ने क्रममा गोरखादेखि काठमाडौंसम्म ओहोरदोहोर गरेका बाटोमा नेपाली सेनाले दुई वर्षदेखि यही बाटो हुँदै काठमाडौंसम्म पदयात्रा गर्दै आएको छ ।
वि.सं.२०७८ पुस २६ सोमवार १६:४२