अखबार नेपाल ट्रेन्डिङ

काठमाडौं: राष्ट्रिय खेलकुद परिषद् (राखेप)का नवनियुक्त सदस्य सचिव टंकलाल घिसिङले नेपाली खेलकुदमा नयाँ युगको सुरुवात गर्ने संकल्प गरेका छन् ।

युवा तथा खेलकुद मन्त्रालयको प्रस्तावमा सिंहदरबारमा सोमबार बसेको मन्त्रीपरिषद् बैठकले घिसिङलाई राखेपको सदस्य सचिव बनाउने निर्णय गरेको थियो ।

नवनियुक्त सदस्य सचिव घिसिङले मंगलबार राखेप पुगेर पदभार ग्रहण गरेका हुन् । पदभार अघि युवा तथा खेलकुद मन्त्री महेश्वर गहतराजले घिसिङलाई पद तथा गोपनीयताको शपथ खुवाएका थिए ।

सदस्य सचिवको सपथ लिएपछि बोल्दै घिसिङले खेलकुदमा नयाँ युगको सुरुवात गर्ने संकल्प व्यक्त गरे । ‘खेलकुदमा नयाँ युगको सुरुवात गर्ने संकल्प गर्दछु,’ घिसिङले भने ।

पदभार गरेपछि बोल्दै घिसिङले आफुले दुई निर्णय गरेको बताए । उनले राष्ट्रिय टिमको तयारी र खेलाडीको वीमाबारे निर्णय गरेको जानकारी गराए ।

घिसिङले राष्ट्रिय टिमको सुधारमा जोड दिने तथा अन्तर्राष्ट्रिय एरिनामा नेपाल किन पहिलो हुन नसकेको बारेमा ध्यान दिएर काम गर्न आवश्यक रहेको बताए ।

उनले आफूलाई सदस्यसचिव जस्तो गरिमामय पदमा नियुक्त गरेकोमा युवा तथा खेलकुद मन्त्रालयलाई धन्यवाद समेत दिए ।