अखबार नेपाल ट्रेन्डिङ

काठमाडौं: अखिल नेपाल फुटबल संघ (एन्फा)ले सहिद स्मारक ए डिभिजन लिग फुटबलको नयाँ खेल तालिका सार्वजनिक गरेको छ ।

एन्फाले सार्वजनिक गरेको नयाँ खेल तालिका अनुसार मंसिर ३ गतेबाट शुरु हुने लिगको पहिलो र दोस्रो चरणका सम्पूर्ण खेल त्रिपुरेश्वरस्थित दशरथ रंगशालामा हुने जनाएको छ ।

यस्तै एन्फाले सार्वजनिक गरेको नयाँ तालिका अनुसार पहिलो र दोस्रो चरणका १४ खेल मध्ये ८ खेल फ्लड लाइटमा हुने भएको छ ।

जारी तालिका अनुसार मंसिर ३ गते हुने उद्घाटन खेलमा फ्रेण्ड्स क्लब र सातदोबाटो युथ क्लबबीच प्रतिस्पर्धा हुनेछ । यो खेल दशरथ रंगशालामा फ्लड लाईटमा साँझ ५:४५ बजेबाट शुरु हुनेछ ।

सातदोबाटो बी डिभिजन लिगको विजताको रुपमा पहिलोपटक ए डिभिजन लिग खेल्न लागेको हो ।

यसअघि कार्तिक २९ गतेबाट शुरु हुने भनिएको लिग एन्फाले प्राविधिक तयारी नपुगेको भन्दै क्लबहरुको सल्लाह अनुसार मंसिर ३ गतेका लागि सारेको थियो ।

एन्फाले जारी गरेको खेल तालिका अनुसार सबै चरणमा सात सात वटा खेल हुनेछन् भने पहिलो चरणको खेल मंसिर ३ गतेदेखी ६ गतेसम्म हुनेछ ।

अहिलेलाई एन्फाले शुरुवाती दुई चरणको खेलको तालिकामात्र सार्वजनिक गरेको छ भने बाँकी चरणका खेलहरुको मिति पछि तय हुने बताईएको छ ।

पहिलो चरण अन्तर्गत मंसिर ३ गते पहिलो दिन एक खेल हुनेछ भने त्यसपछिका दिनहरुमा दुई दुईवटा खेलहरु हुनेछन् । ए डिभिजन लिगमा १४ टिमले सहभागिता जनाउँदै छन् ।