अखबार नेपाल ट्रेन्डिङ

काठमाडौं: नेपाली महिला क्रिकेट टोलीले आज घरेलु टीम कतारसँग दोस्रो टी-२० क्रिकेट खेल्दै छ ।

तीन खेलको टी–२० क्रिकेट सिरिज अन्तरगत नेपालले आज दोस्रो खेल खेल्न लागेको हो । खेल कतारस्थित वेष्ट इन्ड पार्क इन्टरनेशनल क्रिकेट मैदानमा अपरान्ह ३:४५ बजे सुरु हुने छ ।

नेपालले सिरिज अन्तर्गत पहिलो खेलमा कतारलाई १ सय १९ रनको विशाल अन्तरले पराजित गरेको थियो ।

नेपालले आजको खेलमा सहज जित निकाल्दै सिरिज कब्जा गर्ने दाउमा हुनेछ । आफू भन्दा निकै कमजोर देखिएको कतारलाई एक खेल अघि नै पराजित गर्दै सिरिज आफ्नो नाममा गर्न चाहन्छ ।

मंगलबार भएको खेलमा इन्दु बर्माले कीर्तिमानी अर्धशतक प्रहार गर्दा नेपालले सिरिजमा १–० को अग्रता बनाएको थियो । इन्दु नेपालका लागि ट्वान्टी–२० महिला क्रिकेटमा अर्धशतक प्रहार गर्ने पहिलो खेलाडी हुन् ।

आईसीसी महिला ट्वान्टी–२० विश्वकपको एसियाली छनोटको तयारीस्वरूप नेपालले कतारसँग तीन खेलको ट्वान्टी–२० सिरिज खेलिरहेको हो ।

सिरिज अन्तर्गत कतारसँगको अन्तिम खेल मंसिर ३ गते हुनेछ । त्यसपछि नेपाल विश्वकप छनोटका लागि दुबई प्रस्थान गर्नेछ । विश्वकप छनोट नोभेम्बर २२ देखि २८ सम्म दुबईमा आयोजना हुनेछ ।

छनोटमा नेपाल, भुटान, हङकङ, कुवेत, मलेसिया र यूएईसहित ६ राष्ट्र सहभागी छन् । विजेता टोलीले आगामी वर्ष हुने ट्वान्टी–२० ग्लोबल छनोटमा स्थान बनाउने छ ।