काठमाडौं: पछिल्ला केही दिन यता भारतमा लगातार दैनिक २ लाख ५० हजारभन्दा बढीमा कोरोना संक्रमण देखिएको छ ।

भारतमा पहिलो पटक एकै दिन संक्रमितको संख्या ३ लाख  नाघेको छ ।

पछिल्लो २४ घण्टामा थप ३ लाख १५ हजार ८ सय २ जनामा संक्रमण भएको छ ।

२४ घण्टामा संक्रमण पुष्टि हुनेको यो संख्या भारतमा अहिलेसम्मकै धेरै हो ।

पछिल्लो वृद्धिसँगै भारतमा संक्रमितको संख्या १ करोड ५९ लाख २४ हजार ८ सय ६ पुगेको छ ।

भारतमा कोरोना संक्रमणले मृत्यु हुनेको संख्या १ लाख ८४ हजार ६ सय ७२ पुगेको छ । पछिल्लो २४ घण्टामा त्यहाँ थप २ हजार १ सय २ जनाको मृत्यु भएको छ ।

सङ्क्रमण बढेपछि भारतको महाराष्ट्र राज्यमा पूर्ण लकडाउन घोषणा गरिएको छ ।

महाराष्ट्रमा गएको २४ घण्टामा ६७ हजारभन्दा धेरै सङ्क्रमित भएका छन् भने पाँच सय ६८ जनाको ज्यान गएको छ ।

अब आउँदो मे १ तारिखसम्मका लागि लकडाउन घोषणा गरिएको बीबीसीले जनाएको छ ।

महाराष्ट्र राज्यमा विवाह उत्सवमा २५ जनालाई मात्र सहभागी हुन पाउने भएका छन् भने सार्वजनिक बसमा ५० प्रतिशत मात्रै यात्रुलाई चढाउन पाइने छ ।

लकडाउनभर सरकारी कार्यालयमा १५ प्रतिशत मात्रै कर्मचारी रहने छन् भने लोकल रेलमा कामका लागि मात्रै यात्रा गर्न भनिएको छ ।

संक्रमणमा दैनिक नयाँ रेकर्ड हुँदै गएको भारतमा केरला, उत्तर प्रदेश, दिल्ली, गुजरातलगायत राज्य सबैभन्दा धेरै प्रभावित भएका छन् ।

स्वास्थ्य मापदण्ड सहितका नियम उल्लङ्घन गरे कारबाही हुने