अखबार नेपाल ट्रेन्डिङ

काठमाडौं: कुशल भूर्तेलको अविजित अर्धशतकमा नेपालले ट्राई नेसन ट्वान्टी-२० अन्तर्राष्ट्रिय सिरिजमा मलेसियालाई ९ विकेटले पराजित गरेको छ ।

त्रिवि क्रिकेट मैदानमा टस हारेर पहिलो ब्याटिङको निम्तो पाएको मलेसियाले १६.५ ओभरमा सबै विकेट गुमाएर १ सय ९ रनको योगफल तयार गरेको थियो ।

जवाफी ब्याटिङमा उत्रिएको नेपालले १२ दशमलव १ ओभरमा कुनै विकेट नगुमाइ १ सय १० रनको लक्ष्य पूरा गर्यो ।

नेपालका लागि ओपनर कुशलले ४१ बलमा ३ चौका र ५ छक्कासहित अविजित ६१ रनको इनिङ खेले ।

यसै सिरिजमार्फत् ट्वान्टी-२० अन्तर्राष्ट्रियमा डेब्यू गरेका दुई खेलाडी कुशल र आशिफ शेखले १ सय २ रनको शतकीय साझेदारी गर्दै शानदार सुरुआत दिलाएका थिए ।

शनिबार भएको खेलमा डेब्यु गरेका आशिफले डेब्यू खेलमै अर्धशतक बनाएका थिए । आज मलेसियाविरुद्धको खेलमा ८ रनले अर्धशतक बनाउन चुकेका आशिफले २९ बलमा ४ चौका र १ छक्का प्रहार गरेका थिए ।

वान् म्यान डाउनमा क्रिजमा उत्रिएको उप कप्तान दीपेन्द्रसिंह ऐरीले अविजित ६ रनको योगदान गरे ।

मलेसियाका लागि विरनद्वीप सिंहले १ विकेट लिनु बाहेक अन्य बलर असफल रहे ।

यसअघि मलेसियालाई १ सय ९ मा अल आउट गरेको नेपालका लागि करण केसीले तीन विकेट लिएका थिए ।

त्यस्तै, सन्दीप लामिछानेले दुई तथा सोमपाल कामी, उपकप्तान दीपेन्द्रसिंह ऐरी, कुशल मल्ल र साहब आलमले १/१ विकेट लिए ।

नेपालको कसिलो बलिङसामु टिक्न नसकेको मलेसियाले १ सय ६५ ओभरमा सबै विकेट गुमाएर १ सय ९ रनको योगफल तयार गर्‍यो ।

मलेसियाका लागि ओपनर साद अजिजले २४ बलमा ४ चौका र १ छक्कासहित २७ रन बनाए ।

त्यस्तै, सार्भिन मुनियादीले २० तथा विकेटकिपर ब्याट्सम्यान शफिक सरिफले १५ रन जोडेका थिए ।

पहिलो खेलमा नेदरल्यान्ड्समाथि पनि ९ विकेटको फराकिलो जित निकालेको नेपालको यो लगातार दोस्रो शानदार जित हो ।

भोलि हुने खेलमा नेपालले नेदरल्यान्ड्सको सामना गर्नेछ ।