अखबार नेपाल ट्रेन्डिङ

काठमाडौं: विभिन्न जिल्लाबाट काठमाडौं आएका उखु किसानहरु विगत १५ दिनदेखि माइतीघर मण्डलामा प्रदर्शन गरिरहेका छन् ।

हलो, उखु र विभिन्न माग लेखिएका प्लेकार्ड लिएर विगत १५ दिन देखि उखु किसानहरु आफ्नो पसिनाको भुक्तानी पाउनुपर्ने माग गर्दै राजधानीको माइतीघरमा आन्दोलन गर्दै आएका छन् ।

सरकारले उनीहरुको भुक्तानी दिलाउन कुनै पहल गरेको छैन । यो बीचमा केही उद्योगीले किसानको खातामा रकम पठाएका छन् । तर सरकारले तोकेको भन्दा पनि कम दरमा भुक्तानी पाएको किसानहरुको गुनासो छ ।

गत वर्ष पनि उनीहरुले यस्तै आन्दोलन गरेका थिए । तर सरकारको रोहबरमा किसान र उद्योगीबीच एक महिनाभित्र भुक्तानी दिने सहमति भएपछि किसान घर फर्किएका थिए । तर एक वर्षसम्म पनि भुक्तानी नपाएपछि तिनै किसान पुन: काठमाडौं आएर आन्दोलन गरिरहेका छन् ।

सरकारले तोकेको मूल्यभन्दा पनि कम दरमा भुक्तानी पठाएको किसानहरुको गुनासो छ । उखु किसान संघर्ष समिति सदस्य मायाशंकरप्रसाद यादवले सरकारले प्रतिक्विसन्टल ४ सय ७१ रुपैयाँ २८ पैसा मूल्य तोके पनि उद्योगीहरुले ४ सय ३५ रुपैयाँ मात्रै भुक्तानी दिएको गुनासो गरे ।

चिनी उद्योगीहरुबाट उखु किसानहरुले करिब ९० करोड रुपैयाँ भुक्तानी लिन बाँकी छ । विगत सात वर्षदेखिको भुक्तानी पाउन बाँकी रहेको आन्दोलनमा सहभागी किसानहरु बताउँछन् । आफूहरुले दुःख गरेर उब्जाएको उखुको भुक्तानी नपाउँदासम्म आन्दोलन जारी राख्नेआ किसानहरुले बताए ।

र यो पनि पढ्नुहोस्ः
चिनियाँ प्रतिनिधिमण्डल काठमाडौंमा, प्रधानमन्त्रीसहित नेकपा शीर्ष नेताहरूलाई भेट्दै
प्रतिनिधिसभा विघटनविरुद्ध जसपाद्वारा प्रदर्शन
एमसीसी लागु गर्ने पक्षमा उर्जामन्त्री रायमाझी