अखबार नेपाल ट्रेन्डिङ

काठमाडौं: मोटरसाइकल तथा ट्याक्सी सेयर राइडिङ्ग सेवा ‘पठाओ’का राइडरहरु काम छाडेर कम्पनी विरुद्ध आन्दोलनमा उत्रिएका छन् ।

कम्पनीले आफु खुसी निर्णय गरेको, सेवा सुविधा नदिएको, राइडिङ्ग बापतको कमिसन समेत धेरै लिएर कम्पनीले कामदार मार्ने काम गरेको पठाओ राइडरहरुको आरोप छ ।

विना सुरक्षा सडकमा निस्कदा जीवनरक्षाको ग्यारेन्टी कसले लिने भन्दै राइडिङ्गहरुले कम्पनीसँग अतिरिक्त सेवा सुविधाभन्दा पनि सुरक्षाको माग गर्दै आन्दोलनमा उत्रिएका छन् ।

राइडरहरुसँगै यात्रुको समेत बीमा हुनुपर्ने उनीहरुको माग छ । पछिल्लो समय कम्पनीले राइडरहरु माथि ज्यादती गर्न थालेको र राइडरहरुमाथि मनोमानी गरिरहेको उनीहरुको भनाई छ । उनीहरुको कमाईमा समेत कम्पनीले लुट मच्चाइरहेको र कम्पनीले आफुखुसी मन नलागेको मान्छेलाई निस्कासन समेत गर्ने गरेको राइडरहरुको आरोप छ ।

राइडरहरुले विविध ११ बुँदे माग राखेर आन्दोलन चर्काइरहेका बेला ‘पठाओ’ ले भने ‘राइडरहरुको अनावश्यक हो हल्ला’ भन्दै उनीहरुका मागको उपेक्षा गरेको छ ।

कम्पनीको नीति, नियम र अनुशासनमा नरहेका र केही उच्छृङ्खल तत्त्वहरुले कम्पनीलाई बदनाम गर्न लागेको उसको प्रतिक्रिया छ ।

राइडरहरुले गत सोमबार पठाओ कम्पनीमा आन्दोलनसहित ११ बुँदे मागपत्र पेस गरेका छन् । राइडर र यात्रुको अनिवार्य बीमा हुनुपर्ने, राइड शेयरिङ्ग बापत कमाईको कमिसन अधिकतम ८ प्रतिशतमा झार्नुपर्ने, कम्पनीमा आवद्ध राइडरहरुलाई निलम्बन गर्नु पूर्व कम्पनीबाट जानकारी दिनुपर्ने, कस्टुमर केयर नम्बर टोल फ्रि हुनुपर्ने, बीपीजी सस्पेन्ड हटाउनु पर्ने, स्पेन्ट रेकर्ड राख्नुपर्ने, राइडर र युजर पेजेन्जर दुबैले राइड क्यान्सिल गर्न मिल्ने लगायतका माग उनीहरुले राखेका छन् ।

बढीभन्दा बढी फाइदा खोजेका कारण नै अहिलेको पठाओ र राइडरहरुबीचको समस्या बढेको देखिन्छ । ७० को दशक यता नेपाली बजारमा चर्चामा आएका ‘टुटल’ र ‘पठाओ’ सेयर राइडिङ्गको क्षेत्रमा निकै लोकप्रिय छन् ।

टुटल र पठाओको विषयमा बारम्बार प्रश्न उठ्ने गरेको छ । निजी (रातो नम्बर प्लेटमा) दर्ता भएका सवारी साधनले भाडामा यात्रु बोक्न पाउने कि नपाउने भन्ने मुद्दा अहिले पनि विवादकै विषय बनेको छ । तर, अहिलेसम्म सरकारले यो विषयमा ठोस निर्णय गर्न सकेको छैन ।

र यो पनि पढ्नुहोस्ः

मुलुकभर आंशिक बदली, तराईमा हुस्सु लाग्ने क्रम जारी
प्रदेशमा सरकार परिवर्तनको चलखेल भए थप कदम चाल्ने प्रधानमन्त्री ओलीको चेतावनी
कांग्रेसले संसद विघटनविरुद्ध देशव्यापी प्रदर्शन गर्ने